المساعد الشخصي الرقمي

مشاهدة النسخة كاملة : وان طال السفر // محمد عبد الماجد


m.sobhi
06-23-2009, 08:47 AM
ان شاء الله سندرج هنا عمود الصحفي الهلالي الرائع محمد عبد الماجد

http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg (http://www.m5zn.com)

القون من اول نظرة

* انتوا اكيد سمعتوا بي الحب من اول نظرة.
* ما تعملوا فيها ما عارفين الموضوع دا ... الواحد يقلب (الصفحة) زي عيش الريف في الجمر.
* الحب خلوه ... اذا كان الحديث في الموضوع دا بخليكم تتحسسوا ... وتقعدوا تتضايروا ... مثل الزول البقابلك في شارع ضيق .. يكون طالبك فاتحة ... ما تعرف تمشي وين؟.
* اخر حاجة تقول ليه : (طبعا انا كنت برة البلد).
* برة البلد وين يا ود الناس؟.
* الكلام دا انسوه ما تشتغلوا بيه كتير.
* عاوز اكلمكم عن (القون من اول نظرة).
* القون من اول نظرة دا طبعا هدف بصنعو هيثم مصطفي (حفظه الله ورعاه).
* هيثم دا بشوف المهاجم ... بلمحو مجرد (لمحة) كدا.. بيلعب ليه الكورة ... (قون إلا لمسة).
* زي الخمسين في اخر جرة ... كرت عدم بس.
* يا ود الناس انت الكرت دا جبتوا من وين؟.
* قالوا ليك امبيلي الي الان (مهجوم) من الكورة اللعبها ليه هيثم يوم مباراة الهلال واول اغسطس وسجل منها هدف الصعود لمرحلة المجموعات.
* البرنس دا لعب ليه كورة لي امبيلي ... خلت امبيلي دا هو واول اغسطس وجها لوجه.
* امبيلي طبعا ما بتفاهم في الحتة دي ...جمع وطرح باقي السنة من اول اغسطس وجاب قونو وفات.
* حارس اول اغسطس الكنغولي الجنسية عارف امبيلي ... قال للمدافعين ... اتنين يفوت منكم.
* الحارس مسيكين ... قالوا الي الان بكورك اتنين... اتنين ... اتنين يا جماعة.
* المسكين يصحي من النوم يكورك .. اتنين ... اتنين.
* الحاجة الانتوا ما عارفنها ... قالوا ليك (حافظ) في الاسماعلية بدأ يتدرب علي الحركة دي.
* حافظ كل ما يشوف سفاري ودامر ... يقول ليهم اتنين ... اتنين يا دامر.
* عليكم الله هسع دامر ذنبو شنو؟.
* قالوا ليك (الشحات) قال اول حاجة سوف اقعد مع حافظ واشيل منو الهاجس دا.
* وقالوا ليك (حافظ) بعد ما حالتو استقرت .... واقتنع وشال الفكرة من رأسو ... شاف ليك سفاري رابط ركبتو.
* الموضوع ما اتبلع ليه ... طوالي قال ليه : اتنين يا سفاري ... اتنين!!.
* المهم دا هسع ما موضوعنا ... موضوعنا لمسة (سيدا) للكورة التي وصلته من ديمبا.
* ديمبا ذاتو بتاع مشاكل ... في داعي يطلع الكورة بالصورة دي.
* الصورة ياتها؟.
* صورة طمبل.
* والله يا طمبل وقت شفتك .. قاعد في كنبة المنتخب لاحمد عادل ومدثر كاريكا ... عرفت ان (صورك) ما فيها فائدة.
* صور مين يا عم؟.
* زول في المنتخب بقعد احتياطي لاحمد عادل وكاريكا ... عاوز يلعب في الهلال.
* كنبتنا ذاتها ما تحلم بيها.
* ولا حتي تفكر فيها.... شيل الفكرة من رأسك.
* شوف (صورك) وين؟.
* ارجع ليكم لي هيثم مصطفي وباصو القون إلا تلت.
* هيثم مصطفي شاف ليك امبيلي تحت ذبذبة البين بين ... خطوة تانية بتجعل امبيلي متسللا.
* عشان كدا هيثم مصطفي اتصرف سريع ... شغل الاشارات .. ورمي (السبعات) للتمويه.
* المريخاب قعدوا يتغالطوا.
* جنهم غلاط ... تقول في ورثة.
* امبيلي اتقدم خطوة .. مدافع علي يمينه ودافع علي الشمال.
* نسيت ... قبل ما امبيلي يتقدم خطوة.
* شغل الاشارات.
* خلاص يا الهلالاب عاوزين تخلوا اي حاجة وتقبلوا علي الاشارات.
* الاشارات عيشتها تطير.
* تطير تمشي وين في البرد دا؟.
* بعد كدا الحارس (الشليق) طلع من المرمي.... (والمكتولة ما بتسمع الصايحة).
* انا اول مرة اشوف لي حارس متل (كبسور) ... شليق جنس شلاقة.
* امبيلي شاف الحارس ... رمي اشارة شمال.... وجدع الكورة في المرمي.
* باقي التفاصيل طبعا عارفنها ... اتنين ... اتنين يا جماعة.
* هيثم مصطفي عندو برضو صناعة آية في الروعة في ود مدني عندما لمح (كاريكا) .... جدع ليه الكورة.
* ابدا ... قبل كدا شغل (الاشارات).
* الاشارات دي شنو الليلة الشباكنا بيها.
* مدثر كاريكا صاحب الاهداف (الوسيمة) ... جاب ليه قون في الاهلي الي الان (باك) الاهلي قاعد تحت القائم.
* قالوا الباك بقول ... لو مسكت الفانلة كان حصل شنو؟... لا كان اكسر يمين .. لا كان اعمل مخالفة برة الخط ... لا المفروض اطفش الكورة ... لكن برضو بتجي.
* كاريكا ساط الدنيا كلها قبل ان يسجل الهدف.
* انتوا عارفين المواضيع دي كلها (بروفة) للمجموعات.
* ناس الهلال قالوا جابوا ليهم طرف شمال ... الكورة قبل ما يعكسها (بكرفسها).
* وقبل ما يكرفسها ... بطلع ليها تصديق من حكم الراية... عشان المريخاب ديل ما يتغالطوا لينا ساكت.
* وبعد كدا (بكورعها)... كمان قالوا ما عارفين الكروعة.
* السنة كلها تتغالطوا ... زي حملة التطعيم.
* التطعيم عيشتو تطير.
* قالوا ادارة المريخ اصطحبت ريتشارد الي معسكر الاسماعيلي ... عشان يثبت (سفاري).
* قالوا سفاري من هسع بدأ يربط في ركبتو.
* ريتشارد دا شداد قال ليكم ما في طريقة تسجلوه.
* يعني زي قصة ياسر رحمة ... إلا ريتشارد دا يمشي يتسجل ليه في فريق درجة ثالثة .. عشان يجي للمريخ.
* انت يا ريتشارد (الخفة) ليك شنو؟... عشان تمرقها للاسماعيلية.
* وكمان عاوز تعمل اختبارات.
* الجماعة ديل ما عارفنك؟.
* وإلا يكون عاوزين يسجلوك تحت السن.
* اختبارات في البرد دا.
* علي العموم الحمدلله الهلال صرف نظر من ريتشارد... بس ان شاءالله الاتحاد العام يسمح للمريخ بتسجيله.
* لو ما سمح ليكم بتسجيله يا ناس المريخ ... عينوه في الجهاز الفني.
* استفيدوا من خبرات ريتشارد الكبيرة.
* انت يا ريتشارد شلت (صورك) من ناس الهلال.
* يا دي الصور.
* بكرة نواصل.
* ملحوظة: نجيلتنا قالوا بدأت تحبو.
هوامش
* قالوا المريخ ببحث عن (مرق).
* مرق افضل ليكم من امير دامر.
* طبعا عمار مرق ... ناس المريخ في التلفون ما بديهم فرصة.
* بقفلهم من المكالمة الاولي.... ويقول ليهم البطارية نازلة.
* يجب ان يشرع الهلال في تكريم عمار مرق .. الذي نتمني له التوفيق.
* الهلالاب يلتقوا في حب الامل عطبرة والميرغني كسلا .. وحي العرب بورتسودان... طبعا الي جانب هلال الساحل وهلال الجبال.
* عذرا ان اصاب بعض الرشاش الاخوة في نادي حي العرب ... ونحن البينا اعمر من سيكافا.
* علي العموم سيكافا سوف تعد حي العرب جيدا عشان يشيلوا من المريخ ثلاث نقاط في الدورة الثانية.
* بالمناسبة فريق حي العرب المرشح الاول للفوز ببطولة سيكافا.
* حي العرب طبعا في اي سنة عندو ثلاث نقاط من المريخ.
* الادروبات ديل بشيلوها ولا بتلفتوا.
* لا منطق ولا معقول يقبل ان يبقي (امولادي) بعد تسجيل كابوندي.
* وجود محترفين في خانة واحدة ... اهدار لطاقة المحترفين التي يمكن ان يستفيد منها الهلال بصورة امثل.
* اذا نجح الهلال في التعاقد مع الزامبي ادوارد.. يكون الهلال وصل الي قائمة مثالية في وجود مدرب عالمي وكبير.
* الجميل في الهلال ان الجهاز الفني بقيادة كامبوس ... يخطط ويعمل للفوز بكأس الاندية الافريقية للابطال.
* والجميل في مجلس ادارة نادي الهلال انه يعمل علي احراز اللقب ويوّفر مقومات ذلك.
* بعد الهجوم الكاسح الذي تعرض له مدرب المنتخب الوطني ... لا نريد ان نكتب عن قسطنطين.
* انتوا قضية قلق وصلت وين؟.
* المجموعات قربت تبدأ وما في حاجة ظهرت.
* لو وقفوا قلق خمس سنوات .. افضل ليهم من (الجهجهة) دي.
* الاتحاد العام كان يجب ان يحسم قضية قلق في اليوم التاني مباشرة من حدوث المشكلة حتي لا يتيح للمريخاب الصيد في الماء العكرة ... وكل اراء الاعلام المريخي وكل انطباعات الجمهور المريخي اثر فيها موضوع قلق تأثير سلبي.
* وقفوه وخلاص.
* طبعا اعلام المريخ بعتقد ان فشل قسطنطين يعني زوال اسباب معاقبة قلق.
* كمال شداد نظريتكم دي ما بعمل ليكم بيها.
* اذا تمت اضافة كابوندي وايفوسا والمحترف القادم لكشف الهلال الافريقي اتوقع يوم 18 يوليو ان يشيل الكورة لاعب المريخ (امير دامر).
* اصلوا امير دامر عندو روح المبادرة ... ورح القيادة.
* خلي رادان في الاسماعيلية يعلمو كيف يشيل الكورة بي طريقة ظريفة.
* يوم 18 بتشيلوا الكورة بتشيلوها.
* دي حاجة ما بتغالطوا فيها ... ولا بنسمح ليكم فيها بالغلاط.
* غلاط في عينك.
* بكرة ان شاءالله نلتقي في (من الغلاف للغلاف).
* خبر عاجل: يا ريتشارد .. اضحك (الصورة) تطلع احلي.

ريان حسن
06-23-2009, 10:53 AM
تسلم على المجهود يعسل

الجنرال مصعبكو
06-23-2009, 11:04 AM
مشكوووووووووووووووووووووووووووووور

m.sobhi
06-23-2009, 09:34 PM
ريان والجنرال مصعبكو مشكورين على المرور

هلالاب اسياد البلد

ود سنترا
06-23-2009, 10:20 PM
حبيبنا ومتصور جنبنا والله العمود بالجد رووعة ومافيهو كلام ونتمي انك تواصل وتتحفنا يا قلب وتقبل مروري



تخريمه:

الحيشيل الكوره دامر ولا العجب

m.sobhi
06-23-2009, 10:25 PM
مشكور على المرور يا سنترا

وان شاء الله تاني العمود حينزل هنا اول بي اول

تخريمه : شكلو البيشيل الكورة بله جابر عشان شليق وكده

أسيادهواي
06-24-2009, 01:51 AM
تسلم ويديك الف عافيه ويوم 18 جاي وياويلكم يامريخاب شيلوا شيلتكم

ريان حسن
06-24-2009, 02:57 AM
هههههههههههههههههه

الجنرال مصعبكو
06-24-2009, 10:07 AM
* قبل كم سنة ... الهلال شطب الريح كاريكا ... افضل مهاجمي الهلال في العشر سنوات الاخيرة.
* الهلال شطب الريح كاريكا وهو في قمته ...حيث كان كاريكا يسجل الهدف بـ (علبة الهندسة).
* الهدف بجي شايلو في (علبة هندستو).
* كاريكا كان بسجل القون في حامد بريمة افضل حارس في تاريخ المريخ في الحتة البختارها بريمة والبحددها ليه.
* مع ذلك الهلال شطب كاريكا.
* ناس المريخ بقوا يدخلوا ويطلعوا.
* قالوا عاوزين يسجلوا كاريكا .....لكن الطريق كان مسدود للمريخ.
* سافر الريح مصطفي لامريكا ... وعاد بعد سنوات طويلة ليوقع للمريخ ... لكن مستوي كاريكا كان قد تراجع فشطبه المريخ ليختم الريح مصطفي مسيرته في الهلال بيته الاول وعشقه الابدي.
* مرت الايام ... وشطب الهلال افضل مدافع مر في تاريخه في السنوات الاخير ... الصنديد ياسر رحمة.
* ناس المريخ بقوا يدخلوا ويطلعوا ... قالوا عاوزين يسجلوا ياسر رحمة.
* لكن ناس الهلال (الغتة) كاتلاهم ... لم يتركوا سبيلا او ثغرة للمريخ ليسجل اللاعب ياسر رحمة.
* اللوائح كانت تمنع ذلك ... ولم يعرف المريخاب حسن التصرف القانوني كما يفعل الهلالاب في مثل هذه الحالات.
* تنقل اللاعب ياسر رحمة بين كركوج علي ما اعتقد وكوبر دون ان يفوز المريخ بتسجيل لاعب يعتبر من افضل المدافعين في تاريخ السودان القريب.
* والهلال يشطب في احد المواسم حارسه العملاق احمد النور ... والهلال كأنه يصيب مشطوبه بلعنة تمنعه من التسجيل في المريخ.
* لا نعرف ما الذي منع المريخ من تسجيل احمد النور ... وحراسة مرمي المريخ مرت في السنوات الاخيرة بأسوأ فتراتها علي الاطلاق.
* ليت الامر انتهي عند احمد النور...لأن السلسلة حافلة بفشل المريخ في تسجيل مشاطيب الهلال.
* قبل ثلاث مواسم شطب الهلال حارسه محمد ادم ... الذي ضمته غرفة المريخ لتسجيله.
* لكن شيء ما حدث جعل المريخ لا يسجل محمد ادم رغم انه كان علي بعد خطوة من كشوفات المريخ.
* لكن لعنة الهلال اصابة محمد ادم.
* خرج محمد ادم من غرفة تسجيلات المريخ وهو يلعن اليوم الذي دخل فيه لتلك الغرفة.
* خرج محمد ادم من غرفة تسجيلات المريخ وهو يهاجم في مجلس ادارة نادي المريخ الذي تراجع من عهده ووعده للاعب ... وكان قبل ذلك محمد ادم يهاجم من غرفة نادي المريخ في مجلس ادارة نادي الهلال الذي شطبه لأنه يمكث في مدني اكثر مما يمكث في الخرطوم وهو لاعبا للهلال العاصمي وليس لاعبا للاهلي مدني.
* وبعد ذلك ظل (قودوين) يلف ويدور في الفاضي ... لا كان الهلالاب يرغبون في عودته ولا عرف المريخ يصل الي اللاعب الذي ظل رغم بعده من الهلال تحت قبضة الازرق (ممنوع الاقتراب منه ..وممنوع حتي التصوير).
* ونتوقف كذلك عند مشقة المريخ في تسجيل كلتشي الذي رفضه الهلال وفضل عدم التجديد له ... ليتجه اللاعب للمريخ ويدفع المريخ في اللاعب دولارات لا حصر لها ولا عدد ... دولارات كان يمكن ان تحضر افضل لاعب في افريقيا ليلعب في المريخ.
* لكن المريخ لا تطيب له الاشياء إلا اذا كانت بواقي من الهلال.
* علما ان الهلال سجل ايفوسا صاحب الموهبة الكبيرة بتكلفة لم ترهقه كثيرا ... والهلال وجد ايفوسا في يده .. لذلك الهلال لم يخسر شيئا في قيد ايفوسا.
* الان جاء الدور علي ريتشارد ... الذي سافر للاسماعلية للانضمام للمريخ واللائحة هنا في الخرطوم تمنعه من ذلك.
* إلا اذا؟.
* إلا اذا كان المريخ يريد ان ينضم الي اندية الدوري الممتاز المصري ... لأن اتحاد الكرة في مصر قد يسمح بذلك.
* لكن الاتحاد العام السوداني هنا سد الطريق علي ريتشارد وقال كمال شداد كلمته ... لينضم ريتشارد الي ركب لاعبي (الكوبري الجديد).
* المحزن ليس في ان ريتشارد استعجل وسافر للاسماعلية لينضم للمريخ دون ان يتأكد من سلامة موقفه القانوني في التسجيل.
* وانما المحزن هو ان ريتشارد بعد ان لعب في الخرطوم ثلاثة (سابقا) ولعب في المنتخب الوطني ثم جاء ولعب في الهلال قرابة العشر سنوات ... ولعب في مصر ولعب في سلطنة عمان جاء بعد كل هذه المسيرة العطرة ليجري اختبارات في المريخ كما يفعل لاعبو المرحلة السنية في الهلال.
* يا ريتشارد نحن ما معترضين علي تسجيلك في المريخ ... بل نتمني لك ان تسجل في (الاحمر الوهاج) .. ونسأل الله ان يتساهل الدكتور كمال شداد مع الهلال ليتسجل ريتشارد في المريخ.
* وليس هناك اضافة يمكن ان نحسبها للهلال في هذه الفترة قدر ان يسجل ريتشارد في المريخ.
* ولكن نحن اعتراضنا علي الطريقة التي ذهب بها ريتشارد للمريخ ... حيث ينتظر ان يخضع اللاعب لاختبارات يضعها لها مدرب المريخ الكرواتي رادان.
* رادان يا ريتشارد.
* ومنذ الان يمكن ان نراهن ونقول ان مجلس المريخ سوف يصرف النظر عن ريتشارد بحجة انه فشل في الاختبارات ... تحاشيا للاشتباك مع الدكتور كمال شداد وهروبا من الخسارة امام شداد الذي لا يهزم في ميدان قوانين كرة القدم... إلا من المحكمة الدستورية.
* الطريف في الامر ان رئيس المريخ جمال الوالي افتي بامكانية تسجيل ريتشارد في المريخ ... ولا يفتي في الكرة السودانية وشداد موجود.
* عليه فاذا كان جمال الوالي عازما علي تسجيل ريتشارد فاننا نقول له ان هذا لا يمكن الوصول اليه حاليا.
* ونقول له انه اذ اصر المريخ علي تسجيل ريتشارد فان ذلك لن يكون له إلا اذا كان الوالي يريد ان يسجل ريتشارد في رابطة المريخ المركزية.
* الثابت ان ناس الهلال ومجلس الادارة اذا ارادوا يشربكوها بشربكوها ... واذا ارادوا يحلوها بحلوها.
* ناس الهلال كابوندي قالوا استجل بدون (كرت).
* كرت شنو؟.
* كابوندي خط يا اخوي... اها في علم اكتر من كدا.
* ناس الهلال في البدء اخترعوا التجنيس وعرفوا كيف يصلوا الي اضافة محترف جديد عبر تجنسيه فكان ان جنسوا داريوكان.
* من بعد طابت للمريخ حالة الهلال القانونية فاتجهوا الي الدرب الذي فتحه الهلال واصبحوا يمنحون الجنسية السودانية للاعبهم المحترف من سلم الطيارة.
* الاتحاد العام انتبه بعد ذلك الي هذه الثغرة القانونية فاشترط في لائحته وفي المادة 14 ان لا يشارك في اي مباراة في الممتاز اكثر من لاعب مجنس واحد.
* المريخ ارتضي بذلك ... فاعار ايفوسا الي المصري ... وتخلص من باولينو ... لكن الهلال نهاض اللائحة والمادة 14 حتي اسقطها بواسطة المحكمة الدستورية.
* ليجد المريخ الطريق بعد ذلك ميسرا ... بعد ان يسره الهلال.
* الجماعة لقوها باردة ... بدون خجل رجعوا باولينو من البرازيل.
* الهلال في كفاحه القانوني لم يكتف بذلك الانتصار القانوني الذي ثبتته المحكمة الدستورية وانما ذهب يبحث عن ثغرات قانونية فكانت ثغرة (المسكوت عنه).. حيث عرف الهلال طريقا للاعارة ... رغم ان مجلس المريخ دخل من خلال هذه النافذة من قبل لكن دون ان يشعر بها.
* ليأتي الهلال ويفعلها ويجبر الاتحاد العام لكرة القدم بالاعتراف بها وقد كان.
* مع كل هذه النجاحات والانتصارات القانونية التي يحققها الهلال نجد ان المريخ يفشل حتي في تسجيل ريتشارد الذي شطبه الهلال في ديسمبر الماضي.
* نعم فقد جرب المريخ من قبل كوبري عجمان ... وفشلوا ان يصلوا عبر هذا الكوبري الي قودوين ... الذي اختار له الهلال الاحتراف في الاهلي بدلا من نادي عجمان ليبطل الهلال بتلك الخطوة كوبري عجمان.
* المريخ هذه المرة اتجه مرة الي اخري الي كوبري عمان بعد ان فشل في كوبري عجمان.
* لكن الفشل الذي لحق بالمريخ في كوبري عجمان يحيط بالمريخ الان في كوبري عمان.. بعد تصريحات الدكتور كمال شداد للزميل الاستاذ عبده فزع التي عاد واكدها في عدد الامس.
* الذي نعود ايله ... هو ان اعلام المريخ ظل منذ سنوات ينادي علي ريتشارد (ولدنا) ... (ولدنا) عمل ... (ولدنا) سافر ... (ولدنا) قال... (ولدنا) رجع.
* الان اتضح حقا ان ريتشارد فعلا ولدهم ... لكن يستوجب هذا تصحيح فوري وعاجل منهم.
* مطلوب من اعلام المريخ ألا يقول (ولدنا) ريتشارد ... مطلوب منهم ان يقولوا (عمنا) ريتشارد...فقد مضت سنوات وذهبت بعيدا وريتشارد الذي كان ينادونه قبل سنوات بكلمة (ولدنا) الان وجب عيلهم من باب الاحترام ان يقولوا له (عمنا) ... وللسن احكام.
* ملحوظة: نجيلتنا بدأت تمشي.
هوامش
* نتمني ان يعمل مجلس ادارة نادي الهلال مع مجلس المريخ للبحث عن ثغرة قانونية تمكن المريخ من تسجيل ريتشارد.
* ليس امام المريخ خيار غير الاستعانة بصديق.
* يا عماد الطيب شوف ليهم طريقة.
* اتاريه جمال الوالي وقت نادي بتعاون الهلال والمريخ كان بنظر بعيد. تعاون في البرد دا.
* هناك في المريخ في طفرة عالية في الاعمار ... فبعد العجب هناك مجاهد ودامر وطمبل وقلق وريتشارد وباولينو.
* فريق المريخ بقي متل مجلس الشيوخ الامريكي.
* السنة دي المريخ سوف يحقق (الوصافة) بالخبرة.
* في الهلال انهي مجلس الادارة تعاقده مع جوليت وعلاءالدين جبريل وريتشارد وعمار مرق وداريوكان في 6 شهور.
* ممكن يخزن المريخ ريتشارد في نادي عجمان.
* ست شهور تانية ما كتيرة.
* حقيقة نتمني ان يسجل المريخ ريتشارد.
* جبنا ايفوسا بالجنسية ... جابو باولينو.
* اعرنا دي سوزا ... عاوزين يعيروا ديالو.
* اي حاجة نعملها يعملوا مثلها.
* بالمناسبة ناس المريخ الي الان بفتشوا في اسم الفريق الذي اعار اليه الهلال لاعبه دي سوزا.
* الجماعة متحرين. ما قدروا يستوعبوا الجرعة دي.
* بالجد دي صعبة عليهم.
* صعبة الشوية دي.
* في الهلال حارس مرمي جديد من جنوب السودان شاهدناه في تمرين الهلال الاخير يملك امكانيات كبيرة .. نتمني ان يسجله الهلال حتي لو كان ذلك علي حساب لاعب يلعب في الخانات المحددة للكبار.
* مهم ان يكون كشف الهلال فيه اربعة حراس مرمي.
* خاصة ان تمارين الهلال اصبح فيها راجمات وضرب نار ... وهذا ما يجعل حارس المرمي يتعرض لاصابات كثيرة.
* هذا الحارس اليافع في وجود عيسي الهاشماب والسويركي سوف يكون حارس المستقبل في السودان خاصة انه حارس صغير في السن ومن الواضح انه يملك موهبة كبيرة.
* نسأل الله ان يتوفق الهلال في تسجيل الزامبي ادوارد الذي يمكن ان يستفيد الهلال منه في الهجوم وفي الطرف الشمال.
* امولادي ليس هنالك مبرر علي بقائه في كشف الهلال طالما سجل الهلال كابوندي.
* المخارجة من امولادي كان يجب ان تكون قبل المخارجة من دي سوزا ... طالما كان اللاعب البديل يلعب في الطرف الشمال.
* الصائد الشمال في الهلال اضحي فيه كابوندي واحمد الفاضل ومهند الطاهر وهناك صدام الدروشاب.
* لذلك فان اعارة امولادي امر يجب ان يتم اليوم قبل الغد.
* علي مجلس ادارة نادي الهلال ان ينهي تسجيلاته ويتأكد من سلامة موقفه القانوني في الاعارات لأن التسجيلات تبقي لها 6 ايام فقط.
* كامبوس وباهوس ... حولا تمارين الهلال الي صراع بدني وفني وتكتيكي كبير.
* تمارين الهلال بقت مولعة نار.
* ناس المريخ الذين تحدثوا عن شطب مرق ... شطبوا غسان وهو في معسكر الاسماعلية.
* ملحوظة: اعلام المريخ الليلة بكون بعدّ في مشاطيب الهلال.

m.sobhi
06-25-2009, 03:36 AM
مشكوووور على المجهود يا جنرال

يديك العافية وما قصرت بالجد سيد بلد

m.sobhi
06-27-2009, 06:08 AM
http://goansport.net/trawees/majid.jpg
لا مستحيل تحت الهلال


* الحالة التي وصل اليها المريخ الان من ضعف يوضحها اعلام المريخ ويقدمها لنا بالبيان والدليل ..قطعا هذا فيما يكتبونه في هذه الايام.
* بلغ الامر عندهم حد البكاء و(الجرسة) .. و(الولولة) التي تبين ضعف المريخ وهوانه.
* اظن ان نجاح تسجيلات الهلال يثبتها اعلام المريخ .. وتلك (الجرسة) المضروبة من اعلام المريخ لا نريد اكثر منها وهي مقدمة جيدة لهزيمة كبيرة ان شاء الله للمريخ في يوليو.
* اعلام المريخ ... اهمل معسكر الفريق في الاسماعيلي وتفرغ اكرم الهادي سليم لاعداد (الفول) ... حتي اننا ظننا ان معسكر المريخ في الاسماعيلية كان من اجل اعداد (الفول) .. وليس اعداد المريخ لمرحلة المجموعات والدورة الثانية.
* ومعسكر المريخ في الاسماعيلية شكا من خرابه وعدم جدواه مدرب المريخ الكرواتي رادان ... لكن اعلام المريخ لا يبالي في ذلك ... فهو يكتب عن الصورة والكيفية التي شطب بها زرياب.
* فشل المريخ في تسجيل ريتشارد ... وفشل مجلس ادارة نادي المريخ في اعادة قيد ايداهور .. ولكن اعلام المريخ يكتب عن كيف تمت اعارة دي سوزا؟.
* لم يسجل المريخ الي الان لاعبا معارا كان او غير معار.
* بدأوا مسلسلاتهم بي اكرم نشأت ثم حسني عبده ربه ثم طارق التائب ثم محمد حمص .. ولم ينجحوا حتي في تسجيل حارس مرمي فريق الكمال الكاملين.
* مع هذا فان اعلام المريخ يتحدث عن هزيمة الهلال من النسور.
* خسر المريخ من المصري المصري بثلاثية ... واعلام المريخ لا يحسن غير ان يتحدث عن تعادل الهلال مع الامنية.
* الكل يعرف التشكيلة التي مثلت الهلال في تلك المباريات.
* سجل الهلال ايفوسا ويوسف السر وجعفر بركية وسجل عبر الاعارة كابوندي وفي الانتظار سادومبا ..واعلام المريخ يتحدث عن (الترقيع).
* وعن الضل الوقف ما زاد ... وما سجل وما عار.
* وتكاد ان تظن ان ريتشارد (يا الحرموني منك) ذهب للمريخ من اجل اقامة ندوة عن العلاقات الهندية الروسية في الاسماعيلية.
* ما بين القوسين سببه كمال شداد.
* وكأن محمد حمص الذي لهثوا وراءه كان سوف يعار للمريخ من اجل تسجيل حلقة عن حقيبة الفن.
* لقد منح اعلام المريخ مشكورا رئيس نادي الهلال لقبا جديدا .. اذا اسموه بالحاوي .. وظنوا ان هذا امر ينقص منه.
* واعترفوا اخيرا ان الهلال حكومة ... والهلال شعب .. والهلال هو سيد البلد والهلال هو الزعيم.
* اخيرا سلموا بذلك وعرفوا لماذا جاء كابوندي من قبل شهر ... حينما كانوا يسخرون من ذلك.
* وعرفوا كيف يكون الطريق الي طارق التائب الذي وعدوا به جماهيرهم ... وجاء للاحتراف في هلال الساحل.
* دا (سحر) عديل ما بستوعبوا ليكم ... وان اتفرغوا لحسبة عدد مشاطيب الهلال.
* امسكوا العدد.
* قعدوا يحسبوا في عدد النجوم الذين سجلهم الهلال.
* دا انتوا طلعتوا اي كلام.
* حتي الاعارة من التسجيل ما بتفرزوها.
* انتوا الهلال دا ما حدثكم عن (المسكوت عنه).
* ثم من الذي قال لكم ان تسجيل لاعب تحت السن يحسب علي خانات الكبار .. وخانات المرحلة السنية مرحلة تركها الاتحاد العام منطقة حرة للتحرك والتنقل.
* المسكوت عنه دا ... ما بتستوعبوا لينا في السنة دي.
* عاوزين ليكم خمس سنوات .. عشان تستوعبوا (الاعارة) اصلها جديدة عليكم.
* الموضوع دا صعب عليكم.
* اذا كان المريخ فشل حتي في تسجيل (ريتشارد) عاوزين يستوعب ليكم (المسكوت عنه).
* المضحك ان اعلام المريخ كان يتحدث قبل اكثر من شهرين عن فرصة الهلال الوحيدة والمتمثلة في (خانة) لا غير... ليأتي الهلال ويسجل اربعة لاعبين وفي الانتظار اضافة اثنين.
* خانة واحدة بستة لاعبين .. دي ما بتستوعبوها لينا هسع... ولا بعد عشر سنوات.
* صعبة عليكم.
* الحكاية دي زي (الحاوي) البحضر زمان للمدرسة ... يدخل في جيبه (منديل) ويطلع من نفس الجيب 6 (ملايات).
* الملايات مطبقة ونظيفة ومرتبة ومكوية.
* او زي (الحاوي) الذي يظهر في الفيلم الهندي .. الحاوي البدخل ليهو في عين طالب (ملعقة) ويطلع من العين التانية للطالب نفسو (طقم عشاء).
* الشغل دا صعب عليكم... نحن عارفين.
* الكلام دا قلنا ليكم ما بتستوعبوا لينا في السنة دي.
* الغريبة صلاح ادريس قبل شهر ونص احضر كابوندي وفتح خطا ساخنا مع سادومبا ... واحضر من السيلية جعفر بركية.
* يوسف التاج دا ليه 6 شهور بتمرن مع الهلال ... انتوا كنتوا بتفتكروا الهلال كان عاوز يسجلوا في (هلال الجبال).
* بالمناسبة قالوا وقت هلال الساحل سجل (طارق التائب) .. هلال الجبال طوالي فتح خط مع (ابوتريكة).
* اهلة ساكت.
* تتخيلوا الهلال يسجل كابوندي وايفوسا وسيسجل ان شاء الله سادومبا وهلال الساحل يسجل طارق التائب وهلال الجبال يسجل ابوتريكة .. والمريخ يفشل حتي في تسجيل ريتشارد.
* دا انتوا طلعتوا اي كلام.
* ليكم حق تركزوا في (الطابق التاني).
* انتوا يا ناس المريخ صلاح ادريس قبل شهرين ما قال ليكم اذا وافق الاتحاد العام للمذكرة التي قدمها الهلال (خير وبركة) واذا ما وافق علي المذكرة نحن برانا عندنا (حلول).
* عماد الطيب الكلام دا قالوا في التلفزيون ... انتوا كنتوا وين ؟... عشان تتهجموا كل هذه (الهجمة) .. وتتخلعوا كل هذه (الخلعة).
* دي خلعة شنو الوقعتوا فيها دي.
* الحاجة الغريبة السنة دي في المريخ نوردها لكم في النقاط التالية ... ولكم ان تحكموا انتوا بما ترونه لتروا ما انتهي اليه اعلام المريخ.
* سجل الهلال في اول تسجيلاته ايفوسا.... لكن اعلام المريخ لم يعجبه ذلك.
* تتخيلوا عملوا شنو؟.
* ناس المريخ قالوا كيف الهلال يشطب (عمار مرق)؟.
* يا جماعة انتوا مرق مالكم ومالو؟.
* قالوا لا ... كيف الهلال يشطب مرق وهو عريس؟.
* يعني ناس المريخ عاوزين يسنوا ليهم قاعدة جديدة.
* عاوزين يعملوا ليهم نظرية براهم ... لو اشتغلنا بعواطف المريخ دي ... كان اي لاعب يرشحوه للشطب ... يقوم يعرس ... يقوم يخلوه من الشطب.
* تتخيلوا لاعب يكون في كل موسم يترشح للشطب ... يقوم يعرس.
* في اربع سنوات ... زولكم يعرس اربع مرات.
* كل موسم بي عرسة جديدة.
* نتجاوز الحتة دي.
* الهلال سجل يوسف السر ... لاعب المرحلة السنية.
* ناس المريخ ما عرفوا يقولوا شنو؟.
* اليوم التاني طلعوا قالوا كيف الهلال يشطب زرياب.
* يا جماعة انتوا زرياب مالكم ومالو؟.
* قالوا زرياب (مصاب).
* يعني اللاعب لو عرس ما يشطبوا ... ولو (مصاب) ما يشطبوا.
* ناس المريخ اللاعب بمشي معاهم المعسكر للاسماعلية ويشطبوه.
* الشطب دا ما فيه حاجة .. لو كان داخل المعسكر عادي ... لكن شطب لاعب عريس لا يجوز.
* شطب لاعب مصاب لا يجوز.
* خلاص يا ناس الافتاء الفيفي.
* اقعدوا نظروا كدا ... هذا يجوز ... وهذا لا يجوز ... وهذا يجوز ..وذاك لا يجوز.
* بصم ..مابصم ..بصم.
* يجوز ما بجوز ..بجوز ..ما بجوز.
* تتخيلوا جماعتكم ديل مع تنظيراتهم دي ...(ريتشارد) ما قادرين يسجلوا.
* غايتو جنس فصاحة.
* دا انتوا طلعتوا اي كلام.
* طارق التائب الموقوف 75 يوما اتسجل ... ريتشارد لا.
* ريتشارد دا نحن شطبناه من شهر ديسمبر ... المسكين مرقها الي سلطنة عمان ... مع ذلك فشلتوا في تسجيله.
* الكوبري طلع فيه غشة في الاعمدة الخرصانية.
* شداد طبعا خبير (كباري).
* عارف الموضوع دا من زمن كوبري توتي الجديد.
* ناس الهلال ديل غسان من معسكركم عاوزين يسجلوه.
* دا ما شغل قوانين... دا شغل (حاوي) عديل.
* الطريف ان اعلام المريخ كما ذكرنا اعترض علي شطب عمار مرق ... واعترض علي شطب زرياب...واعترض علي اعارة دي سوزا ولم يكتفوا بذلك.
* تتخيلوا عملوا شنو؟.
* الناس ديل اعترضوا علي ارجاع (صالح عبدالله) من المطار.
* قالوا كيف ناس الهلال يرجعوا صالح عبدالله من (المطار).
* يعني بالواضح كدا الاعارة او الشطب من المطار لا يجوز.
* يجوز .. ما يجوز ..يجوز... ما يجوز.
* يا ربي الفيفا عندها رأي ولائحة في عودة اللاعب من المطار.
* تصوروا نحن اول مرة نعرف المعلومة دي.
* صالح عبدالله عودته من المطار لا تجوز ... بينما شطب غسان في معسكر الاسماعلية ما فيها اي حاجة.
* شطب اللاعب في المعسكر ..حاجة عادية شديد.. امر بحصل في ارقي العائلات.
* خسارة العشرة والملاح ... اقصد خسارة العشرة والفول.
* دا فولكم طلع اي كلام.
* فول مين يا عم؟.
* فول اكرم.
* هسع الفول دا عاوز ليهو (حاوي).
* ملحوظة: سمح الفول البصلحو اكرم.
هوامش
* كامبوس ح يلعب بي ثلاثة مهاجمين.
* عشان كدا ناس المريخ ما عارفين يتصرفوا كيف؟.
* يعني ناس المريخ تاني ح يلعبوا بي 10 مدافعين... غير حارس المرمي.
* ناس المريخ لم يعترضوا علي شطب مرق وشطب زرياب وإعارة دي سوزا فقط ... وانما اعترضوا حتي علي تسجيل طارق التائب في هلال الساحل.
* وضح ان علاقة جمال الوالي ممتازة فقط مع اندية سيكافا.
* دا انت طلعت اي كلام يا جمال الوالي... ريتشارد ما قادر تسجلو.
* تسجلو وين مع البرد دا.
* هو وين البرد البسجلوا ليهو (ريتشارد).
* بعد وصول سادومبا ... مفروض رابطة اهل الهلال منذ الان تسافر دبي ... تحجز الفنادق والميادين.
* بعد دا بقينا ناس دبي ساكت.
* المريخ طلع من المولد بدون (حمص).
* لا استفاد من الاعارة ... لا استفاد من التجنيس.
* الناس ديل قاعدين ساكت.
* تلقاهم الي الان بقولوا (المسكوت عنه) دا شنو؟.
* يكونوا فاكرين الموضوع دا في الانتخابات الايرانية ... او يكونوا فاكرينو في احداث 11 سبتمبر.
* اذا كان دا حالكم ...(الوصافة) تاني ح نشوف ليها زول غيركم.
* طارق التائب في هلال الساحل ... تمهيدا يا تري لتسجيله في الهلال (سيد البلد) ... ام لتسجيله للهلال (الزعيم).
* نخليها ليكم (مفاجأة).
* المريخ لو اتغلب من الهلال ثلاثة في يوليو القادم ... يكون كويس.
* ناس سفاري قالوا طلبوا (الاعارة).
* اعارة في البرد دا.
* قالوا صلاح ادريس بفتش ليه ثغرة جديدة في القانون ...ثغرة يسجل بيها (سفاري والسعودي).
* الثغرة دي قالوا اسمها (الزغونة).
* الزغونة دي ما بتفهموها لينا ... ما دام (المسكوت عنه) الي الان ما قادرين تستوعبوا لينا.
* استيعاب مافي.
* الهادي خشبة في مصر شاف الهلال ... قال امسكوا (الخشبة).
* الناس ديل مسكوا عدد المشاطيب.
* نحن بنعرف انه لا مستحيل تحت الشمس ... بل لا مستحيل تحت الهلال.
* في رجب تم تسمية الهلال بفضل هلال رجب ... وفي رجب هذا ان شاء الله سوف يكتمل الهلال بدرا.
* جاء عابرا في بوابة عبدالقيوم ... شافها واقفة قال للزول المعاه ... ناس الهلال لو عاوزين يسجلوا البوابة دي بسجلوها ... ما في حاجة بتقيف قدامهم ... الله يستر علي (السعودي).
* يا ناس المريخ خلوا بالكم من (سفاري) ... قالوا صلاح ادريس براجع في (عقد) سفاري.
* صلاح ادريس دا لو لقي (ثغرة) في عقد كمال عبدالغني بسجل (سفاري).
* من هسع كلمناكم .. مراعاة للخلعة.
* قلق فعلا قلق... اسم علي مسمي.
* المريخ يفوز 1/صفر علي الانتاج الحربي ... مبروك كتير لي (ريتشارد).
* بصمة ريتشارد ظهرت.
* خبر عاجل: النجيلة دخلت المدرسة.

الجنرال مصعبكو
06-27-2009, 11:40 AM
مشكووووووووووووووووووووووووووووووووووووووووووووووو ووووووووووور
يا مستر علي المجهود الكبير دة
لك مني جزيل الشكر

m.sobhi
06-27-2009, 04:33 PM
والله الشكر لك انت على الاهتمام الاكتر من رائع بالقسم ده

تسلم يا ولدنا

الجنرال مصعبكو
06-27-2009, 04:37 PM
هههههههههههه
معقولة بس هو في احسن من الرياضة
والازرق
و ضلنا ههههههههههه

m.sobhi
06-27-2009, 04:44 PM
احسن من الرياضه والازرق مافي
لكن ضلنا اخير منو هلال الساحل
والله بعد هلال الساحل ده جاب التايب
مفروض الوالي يجيب ميسي طوالي

الجنرال مصعبكو
06-27-2009, 04:51 PM
ههههههههههههههههههه
الناس ديل الله يعوضن ساي
زول زوزو في كشوفاتن ماف
رتشرد ولسة ماسجلو
والله الله يعينن ساي
مع كابوندي دة

m.sobhi
06-30-2009, 08:58 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg (http://www.m5zn.com)

امولادي لا بنبلع لا بفوت


ثبت بما لا يدع مجالا للشك ... ان اللاعب النيجيري مصدر (قلق) دائما ..وهو مثل (شوكة الحوت) لا بتتبلع ..لا بتفوت.
* اللاعب النيجيري لاعب غير منضبط وغير ملتزم وهو يسبب صداعا بشكل مستمر للفريق الذي يلعب له.
* اذا تتبعنا سيرة اللاعب النيجيري في الهلال او في المريخ سوف نجد ان اللاعب النيجيري (راسب) في السلوك .. و(ساقط) في الانضباط .. وهو الي جانب ذلك (فنيا) لا يعطي بصورة مستمرة.
* اللاعب النيجيري قد يقدم موسما جيدا ويأتي بعد ذلك ويكون مردوده الفني ضعيفا بشكل مخجل.
* غير ذلك فان اي لاعب نيجيري نجده (خارج الشبكة) في موسمه الاول .. وهذا امر يثبته قودوين وكلتشي ويوسف محمد وافياني جميعهم كان موسمهم الاول في الهلال دون الطموح.
* كذلك نجد ان اللاعب النيجيري في المريخ يقدم ايضا موسما اكثر ضعفا وهذا يؤكده ايداهور وايفوسا ووارغو.
* مسيرة كلتشي وقودوين وايداهور في الهلال والمريخ كانت حافلة بالمشاكل التي وصلت حتي اقسام البوليس.
* اضف الي كل ذلك فان اي لاعب نيجيري لم يكن ملتزما في مواعيده وكان يأتي بعد ان تكون فترة الاعداد وصلت لمرحلتها الاخيرة.
* نحن نقعد نترقب في الطيارات متل (الماهية).
* كلتشي في اخر مواسمه مع الهلال استبعده مدرب الهلال ريكاردو بعد تصريحات المدرب البرازيلي للزميل الاستاذ كبوتش عندما قال للاخر في تصريحات صحفية انه استبعد كلتشي من حساباته والهلال وقتها كان يعسكر في تونس.
* الموسم الماضي كان كلتشي احد اسباب خسارة الهلال للممتاز.
* كذلك رأينا مسلسلات الثالوث النيجيري مع المريخ فقد سافر كلتشي الي امريكا وسافر ايداهور الي دبي اما وارغو فقد احتضن الخمسة مليون دولار واستعصم في بلدته ومسقط رأسه.
* التلفون قفلو.
* اذا عدنا الي الهلال سوف نجد ان مسلسل قودوين حافل بالمخالفات والتعالي والتكبر علي نادي قدمه الي النجومية فكان جزاء الهلال الجحود والنكران.
* قودوين بعد الملايين التي حصدها من الهلال ونالها في السعودية والامارات خرج الان يهدد الهلال بالفيفا مطالبا بـ 120 الف دولار.
* 120الف في عينك.
* هذه وقائع تثبت ان اللاعب النيجيري في السودان لا يجني منه غير التعب والرهق .. وقد صدق الدكتور كمال شداد عندما حذر الهلال من ان يصبح هلالا لنيجيريا.
* الهلال بوجه خاص قدم للمحترفين النيجيريين الكثير ... ورئيس نادي الهلال صلاح ادريس بفضله ادخل تلك الكمية الكبيرة من اللاعبين الذين احضروا من نيجيريا وجنس بعضهم ومنح البعض الاخر منهم الجنسية السودانية مع ذلك كان جزاء ذلك الاحسان ... النكران والجحود والقعاد في (الضل).
* وصل اللاعب النيجيري الي الخرطوم وبلغ حتي بورتسودان .. بل وصل كادوقلي ولعب في هلال الجبال.
* ومضي اللاعب النيجيري ابعد من ذلك ولعب حتي في اندية الدرجة الاولي حيث لعب بعضهم في اهلي شندي وبعضهم لعب في جزيرة الفيل.
* الدافوري السوداني بقي نصو من نيجيريا.
* كل هذه الاشياء تثبت ان السودان فتح نافذة مهمة للاعبين القادمين من نيجيريا وبفضل الهلال احترف قودوين في الاهلي الاماراتي ثم احترف في الاهلي السعودي ... وحصد كلتشي دولارات لا حصر لها من المريخ ... لأنه فقط كان يلعب في الهلال.
* اما يوسف محمد اكثر اللاعبين النيجيريين التزاما وانضابطا فقد لعب وهو في الهلال في المنتخب النيجيري الاول واحترف بعد ذلك في احدي الدوريات الاوربية.
* مع هذا فان اللاعب النيجيري لم يقدم شيئا للكرة السودانية ... لأن الانتصارات المحلية يمكن ان تحقق باللاعب المحلي .. اما الانتصارات الخارجية وتقدم الهلال والمريخ فيها فهي يمكن ان نفرح بها ونسعد ولكنها في النهاية تبقي دون تسجيل بطولة خارجية معتمدة.
* لا سيما وان اللاعب المحترف قصد من التعاقد معه الفوز ببطولة خارجية وهم من دون شك فشلوا في ذلك.
* في المواسم السابقة جاء للهلال (افياني) وكان تسجيل اللاعب في الهلال عبر طريقة (سل الروح) حيث انتظر مجلس الهلال وجماهيره كرت اللاعب (حتي الساعات الاولي من الصباح) علي طريقة صحيفة (اخبار اليوم) .. وكان ذلك في اخر يوم في ايام التسجيلات.
* تنفست جماهير الهلال الصعداء بعد وصول كرت افياني.
* يا ريتو ما وصل.
* افياني لم يقدم شيئا للهلال في اول موسم يلعب فيه بالسودان وان كان افياني سجل هدف الفوز امام اينمبا وسجل كذلك في مرمي المريخ ولكن في الدورة التنشيطية.
* غير ذلك لم يكن هناك اثر للاعب في الهلال واظننا نتفق ان مردود اللاعب كان ضعيفا وان تسجيل هدف في شباك اينمبا وهدف في شباك المريخ في مناسبة ودية يثبت ان حصاد الهلال من هذا اللاعب كان هشيما.
* الشيء الملفت للنظر ان تسجيل افياني في الهلال لم يكن هو وحده الذي (يسل الروح)... بل كان التخلص من اللاعب هو الاخر (يسل الروح) ... اذ عاند اللاعب الهلال واجبره علي ان يدفع له اموالا اكثر من التي سجل بها في الهلال .. لينهي الاتحاد العام تعاقد اللاعب مع الهلال بعد رهق كبير.
* احتمال افياني يكون عمل ليه فرع بنك في نيجيريا.
* اما وارغو فمن الراجح ان البنوك السويسرية اعتبرته العميل الامثل.
* الان امولادي يقدم نفس السلسلة التي قدمها سلفه افياني ..اذ نجد امولادي بعد المستوي المتواضع الذي قدمه مع الهلال في النصف الاول من الموسم الرياضي يماطل الهلال ويتدلل عليه ويتخير حتي في الاندية التي سيعار اليها.
* يا ود الناس خارجنا.
* اضاير لينا من هنا ... امشي ...كرهتنا السد ذاتو.
* قاعد لينا كدا زي (سيد البيت)... تشوفو قبل (الشهر).
* نيجيريا دي قصتها معانا شنو؟.
* غير كل هذا فان الاتحاد النيجيري لا نعرف متي يخلص اوراقه ومتي يرسلها اذا طلبت منه .. والمراسلات تصل و تخرج منه علي مهل من مكاتب الاتحاد النيجيري.
* نحن لا نعرف متي سوف تصل مخالصة الاعارة للاعب الهلال امولادي فهي طالما قادمة من الاتحاد النيجيري فاننا لا نستبعد ان تصلنا سنة 2015م.
* هسع يقولوا ليك الخريف بدأ في الهند.
* انا ما عارف علاقة خريف الهند بالاتحاد النيجيري شنو؟.
* اذا كانت الورقة المطلوبة قادمة من الاتحاد النيجيري فانك يمكن ان تتخيل اي شيء.
* ما تبقي من انتهاء فترة التسجيلات التكميلية مدة تقل عن الـ 48ساعة .. وهي مدة قصيرة جدا بحسابات المد والجزر النيجيرية.
* الله يدينا الصبر.
* لذلك فان مجلس ادارة نادي الهلال عليه ان يتحرك بايقاع اسرع ... لأن عامل الزمن لم يعد في صالحه .. خاصة انه سوف ينتظر افادة اتحاد جنوب افريقيا لاعارة سادومبا للهلال وربما تكون هناك حاجة لافادة اخري من الاتحاد الموزمبيقي.. كل هذه الخطوات يستلزم ان تكون بعد ان تأتي ورقة الافادة من ناساروا النيجيري طلبا للاعب الهلال امولادي.
* الذي يجعل الاعصاب تحترق هو ذلك الترقب والانتظار لأن جماهير الهلال الان تترقب بنفس احساس محمد الامين في (وعد النوار) اذ يقول : (لو وشوش صوت الريح في الباب يسبقنا الشوق قبل العينين).
* ونحن الان نترقب ... لو وشوش صوت الباب .. نقول .. الاعارة وصلت.
* لو الشباك لعب بيهو الهوا ... نقول الاعارة.
* لو في زول (مسكل) ليك بالغلط نقول الاعارة.
* لا سيما وان اللاعب المنتظر والذي نترقب باذن الله وتوفيقه دخوله كشوفات الهلال لاعب يستحق مننا ذلك.
* من الطبيعي ان تحترق اعصاب جماهير الهلال وهي تقرأ في الصحف في كل يوم مانشيتا عريضا وطويلا يقول : سادومبا يكتب خطاب ابداء الرغبة اليوم باتحاد الكرة.
* الجماهير تأتي من كل فج عميق .. وترجع بعد ان يرفع الامر الي الغد.
* ويا يوم بكرة ما تسرع تعال.
* الناس في شارع البلدية بقت تغني رائعة الهادي ادم التي تغنت بها ام كلثوم (أغدا القاك؟).
* أغدا توقع؟.
* اقول ليكم حاجة .... احسن نرجع للنجيلة.
* ملحوظة :نجيلة مين يا عم؟.
هوامش
* امولادي دا لو قعد في الهلال ... يا عماد الطيب كلنا بنقلب نشجع هلال الساحل.
* معقولة طارق التائب يلعب في هلال الساحل.. وامولادي يلعب في الهلال العاصمي.
* الظاهر علينا ح نشجع النجيلة.
* عاوزين نعمل لينا رابطة ... نسميها رابطة اهل النجيلة.
* لو امولادي دا قعد في الهلال ...رجعوا لينا افياني .. عشان (وجع القلب) يكون (فيفياني).
* فيفياني دا ما تشتغلوا بيها كتير.
* ريتشارد قالوا كتب ابداء رغبة.
* يا ريتشارد بعد العمر دا كلو عاوز تعمل ابداء رغبة.
* طيب ناس النعيم وجعفر بركية يعملوا شنو؟.
* هجوم الهلال بقي مولع ... امبيلي وسادومبا وكاريكا واحمد عادل وريتشارد.
* ريتشارد براه ما مقصر.
* طمبل في المريخ ح يفقد ريتشارد في الهلال.
* احسن خدمة يمكن ان يقدمها اتحاد الكرة للهلال هو ان يسمح للمريخ بتسجيل ريتشارد.
* بعد عشرين سنة قد يسجل المريخ النعيم رونالدينو علي طريقة ريتشارد.
* بختك يا النعيم لقيت ليك فريق يسجلك بعد عشرين سنة.
* طمبل لقي دفعتو.
* ايفوسا في القاهرة قال جيبوا لي (كرت) ريتشارد.
* انت يا ايفوسا عاوز بي كرت ريتشارد شنو؟.
* يكون عندو رأي.
* امير دامر نفسو اتقطع من هسع.
* قالوا في زول قال ليه الهلال ح يسجل سادومبا.
* ننصح مجلس المريخ يزيد عدد الطاقم الطبي في المريخ.
* مفروض ناس الهلال يكرموا (ميخا).
* ميخا قدم خدمة كبيرة للهلال بتدريباته (القاطعها من رأسو).
* انتوا سيكافا حاصل فيها شنو؟.
* زول شغال بيها مافي.
* شطب غسان من المريخ احدث ضجة اكثر من سيكافا.
* الرابح الوحيد في تسجيلات المريخ في التكميلية هو غسان.
* نجاد سجلوه في القاهرة.
* غسان شطبوه في الاسماعيلية.
* السنة القادمة اذا عسكر المريخ في الاسكندرية ما عارف البحصل شنو؟.
* خبر عاجل: النجيلة عملت ليها رقم تلفون.

m.sobhi
06-30-2009, 09:02 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg (http://www.m5zn.com)
الرجفيبة حصلت


لا احد تخفي عليه (اثار) الرجفة التي اصابت المريخ من جراء تسجيلات الهلال الاخيرة.
* بقوا زي (الكشري) قدام الضلع.
* لا احد يخفي عليه ذلك .. فقد ظهرت ملامح (الرجفة) في كل تصرفات مجلس ادارة نادي المريخ وانعكس ذلك حتي في كتابات اعلام المريخ.
* اعلام المريخ وحده كون لجنة في الاتحاد العام من اجل التحقيق في اعارة دي سوزا.
* دي حصلت متين؟.
* تتخيلوا الاتحاد العام دا فاضي للدرجة دي يكون ليهو لجنة للتحقيق في اعارة لاعب ... عشان اعلام المريخ ما عارف اسم النادي الذي اعير له دي سوزا.
* انتوا وقت اسم النادي ما عارفين اسمو بتغالطوا في شنو؟.
* تصوروا الاتحاد العام الذي لم يكون لجنة في تسجيل نجاد في القاهرة .. ولم يكون لجنة في شطب غسان في الاسماعلية ... جاء وكون لجنة للتحقيق في اعارة دي سوزا.
* الهلال اعار دي سوزا ... اعلام المريخ اعترض وهاجم قطوعات الكهرباء في نيوزلندا.
* الهلال شطب عمار مرق ... اعلام المريخ قالوا كيف الهلال يشطب مرق... وهاجم قطوعات المياه في مومباي.
* الهلال طلع من دريم لاند اعلام المريخ اعترض..وهاجم حركة هبوط الاسهم في طوكيو.
* الهلال رجع صالح عبدالله من المطار ... ناس المريخ وضعوا يدهم في قلبهم ... قالوا صلاح ادريس دا عاوز يعمل شنو تاني.
* يكون عاوز يوصل كهرباء من العمود التاني.
* وبيني وبينكم الدنيا برد.
* والبرد ذاتو خشم بيوت.
* والاحتمالات واقعة.. واي حاجة في الدنيا دي جائزة.
* الواحد لو عاوز يقلع ليهو (ضرس) يقولوا ليه انتظر الكرت يصل.
* علي العموم نحن تعودنا علي هذا الذي يخرج من اعلام المريخ ... لأن اي لاعب يسجله الهلال ... الجماعة يقعدوا يجرسوا ويقولوا تسجيلوا غلط.
* افضل من هذا تكربوا دفاعكم ... بدل ما تقعدوا تدفقوا مويتكم علي الرهاب.
* اعلام المريخ دا زي ما قال الاستاذ صلاح التوم من الله حالتو تشبه حكاية الزول الشاف هلال العيد .. وقال للناس : يا هو داك الهلال.
* قام الناس اتكيفوا منو واتبسطوا شديد وصفقوا ليهو .. قام قال ليهم ... داك تاني هلال.
* يا ود الناس اسكت.
* هسع اعلام المريخ كل ما الهلال يسجل ليه لاعب يقولوا في غلط في تسجيلو.
* مرة يقولوا الوكيل.
* ومرة يقولوا العمر.
* ومرة يقولوا الاعارة.
* كل مرة يطلعوا ليهم بي حاجة.
* يمكن ان نعتمد وقوع مجلس ادارة نادي الهلال والاتحاد العام في خطأ اذا كان طلب الاعارة جاء بتاريخ لاحق .. اي ان تاريخ الطلب كان بعد تسجيل كابوندي.
* لكن الجماعة ديل براهم قالوا تاريخ طلب اعارة دي سوزا كان يوم 6 يونيو.
* قول يوم 5 يونيو ... شنو يعني؟.
* خلاص اكتشفتوا الذرة.
* الاعجب من ذلك انهم قالوا ان خطاب الاعارة هذا وصل مع خطاب طلب اعارة امولادي ... والهلال حتي مساء امس كان منتظر خطاب الاعارة هذا ليكتب سادومبا طلب ابداء رغبة للعب في الهلال.
* امولادي طبعا ما بتخارج بي سهولة.
* تتخيلوا مجلس ادراة الهلال وصله طلب اعارة امولادي مع ذلك المجلس منتظر الخطاب.
* المضحك ان اعلام المريخ يطلق الكذبة في شارع القصر ويأتي ويصدقها في شارع المك نمر.
* يصدقوها في شارع المك نمر .. ويقعدوا يغالطوك في شارع البلدية.
* ونحن نشيل ونقنع.
* امشوا شوفوا (سيكافتكم) وين؟... يا بتوع سيكافا انتوا؟.
* انا اول مرة اشوف لي ناس مشاركة في سيكافا وقاعدة تتفاصح.
* سيكافا دي مفروض تتدسوا منها عديل.
* واضح ان المريخ دخلتو (الرجفة) ... مباراة القمة الافريقية باقي ليها (17) يوما ولابد ان المريخاب فقدوا التركيز.
* ناس الهلال .. كل يوم والتاني يجيبوا ليهم لاعب.
* وناس المريخ حاجات زي دي ما بستحملوها.
* قالوا ليك كابوندي دا عندو (لفت) متل دليل السواح.
* قولوا ما شاءالله.
* سادومبا دا (الباك) بخليهو بدون ضرس.
* قولوا ما شاءالله.
* غايتو ناس امير دامر ديل إلا يشوفوا ليهم (دكشنري) يخشوا بيهو المباراة.
* سفاري طبعا ربط الركبة التانية.
* المسكين فاكر (الركبة) بتمرقو.
* معقولة خط هجوم فيه امبيلي وسادومبا وكاريكا .. وخلفهم يوجد مهند الطاهر وهيثم مصطفي وايفوسا... يقعد ينتظروا سفاري.
* انتوا قال ليكم سفاري ما عارف.
* دي حاجة ما بتتقابل.
* قالوا ليك مجلس ادارة نادي الهلال سوف يشترط علي اي مشجع هلالابي يدخل مباراة للهلال ان يشيل ليه (آلة حاسبة).
* امسكوا العدد ساكت.
* اي مشجع تاني بدخل مباراة للهلال بلقي في ثلاثة اقوان ما شافها.
* القون الاول قبل ما تقيف في الصف امبيلي بجيبو.
* القون التاني سادومبا مع وقفتك في الصف بجيبو.
* القون الثالث مع تقطيع التذكرة كاريكا بجيبو.
* مهند الطاهر بقلب الهوبة بعد الهدف الخامس.
* تاني القون في الهلال بالحجز.
* كامبوس ذاتو ما بقصر ... جهز ليه ثلاث خطط .. وصلاح ادريس اليوم والتاني بسفر ليه لاعب عشان يلحق بالمعسكر.
* سادومبا طبعا ضايق قعد يتمرن براه.
* يا ود الناس اصبر ... يشوفك اعلام المريخ يقوم يقدم فيك شكوى ... يقولوا في الشكوى ... سادومبا بتمرن قبل كرتو ما يصل.
* الضيقة كعبة.
* انا اول مرة اشوف لي زول يسافر قبل ما يستلم التذاكر.
* عشان كدا امير دامر ليهو حق تدخلو (رجفة)... المسكين بقي كل ما يشوف ليهو زول يسألو الساعة كم؟.
* الساعة عاوزة تحلك يا امير دامر.
* سفاري طبعا قلت ليكم ربط الركبتين ... وبقي يفتش في الركبة الثالثة.
* اتلخبط في الدنيا الضيقة دي ... افتكر عندو ثلاث ركب.
* عاد الركبة عاوزة تحلك يا سفاري.
* نعود الي الرجفة التي اصابت المريخاب وظهرت في اعلامهم.
* قالوا ليك المريخاب من اللخبطة الحصلت ليهم ... المجلس عاوز يشطب (مجاهد) ..قام شطب (غسان).
* ما بتلخبطوا وكدا.
* يا ناس المريخ بقيتوا ما بتفرزوا غسان من مجاهد ...اللخبطة الحصلت عليكم شنو؟.
* انتوا هو فاضيين ... السنة كلها مركزين في تسجيلات الهلال.
* ناس المريخ بعد ما شطبوا غسان .. اكتشفوا انو مجاهد قاعد.
* قام تاني ناس المريخ اتلخبطوا.
* عاوزين يسجلوا باولينو ... قام جابو ريتشارد.
* ما بتلخبطوا وكدا.
* يوم 17 قرب ... عارفنكم نحن ومقدرين رجفتكم.
* كمان يا ناس المريخ ريتشارد من باولينو ما بتفرزو.
* دي رجفة شنو الحصلت عليكم دي.
* لو دا حالكم مفروض الهلال يوم 17 يلعب ليكم بي ناس النعيم وجعفر بركية.
* المشكلة مع التسجيلات دي ... كامبوس في القاهرة قالوا شغال (كمبسة) ساكت.
* الرجفة ناس الاهلي المصري دخلتهم.
* طبعا ناس الاهلي المصري من عرفوا الهلال سجل سادومبا ..قعدوا يضايروا .. ومشوا يعسكروا في المانيا.
* المانيا بتحلكم يا ناس الاهلي.
* الاهلي هسع ذنبو شنو؟.
* امبيلي وسادومبا.. مرة واحدة.
* هجوم الهلال بقي (القاعدة) عديل.
* انت يا امير دامر القاعد ليها شنو؟.
* اتخارج من بدري يا ود الناس.
* سفاري عمل الحيلة في (الركب).
* انت طالب بي شطبك من بدري ... ألحق نفسك قبل يوم 17.
* الليلة طبعا ما في زول بتذكر النجيلة.
* نجيلة مين يا عم؟.
* ملحوظة: النجيلة ... (اعاين ليها واضحك وامشي واجيها راجع).
هوامش
* امولادي اتخارج ... والسور وصل... والنجيلة قامت.
* تاني ما في اي مشكلة.
* المريخاب اعترضوا علي اعارة دي سوزا الي نادي اكوي يوناتيد.
* انتوا عاوزين الهلال يعير دي سوزا لنادي مانشيستر يوناتيد.
* المريخاب طلعوا من المولد بدون حمص ... بل طلعوا من المولد بي يوسف التاج.
* قالوا عاوزين يعرفوا اسم النادي الذي اعير له دي سوزا ... طلع النادي اسمو (اكوي) يوناتيد.
* جنس مكوة.
* صلاح ادريس بسبب الجهد الذي بذله قبل مباراة الهلال والاهلي المصري التي فاز الهلال فيها بثلاثية اصيب بالاغماء ... وبسبب الجهد الذي بذله صلاح ادريس في التسجيلات الاخيرة ايضا اصيب صلاح ادريس باغماء.
* هذا يوضح الجهد الذي بذله مجلس ادارة نادي الهلال.
* خايف بكرة ناس المريخ يقولوا سور الهلال وصل قبل ما يصل كرتو.
* ممكن تطعنوا في وصول السور.
* غير كدا ما عندكم طريقة.
* بخت المريخاب يوسف التاج لن يشارك في مباراة القمة في 17يوليو.
* المريخاب بشكوا من كابوندي وببكوا من سادومبا.
* جمال الوالي مسكين ... تاني ح يعمل ليه طابق.
* بداية الطابق الثالث سوف تكون بعد يوم 17يوليو.
* جهزوا طوابقكم.
* طوابق مين يا عم؟.
* بكرة ان شاءالله نلتقي في (من الغلاف للغلاف).
* الشيء عاوزة ليها صفحة.
* رجفة الاستاذ عبدالمولي الصديق طبعا ما زي رجفة المريخاب ... عشان رجفة الاستاذ عبدالمولي رجفة محبة .. ورجفة المريخاب رجفة خوف.
* اقول ليكم حاجة.
* امير دامر طالب باعارته الي نادي السكة الحديد لبنان.
* هو في نادي في لبنان بالاسم دا.
* الاتحاد العام اكد عدم قانونية شطب زرياب ... عارفين ليه؟.
* عشان يؤكد عدم قانونية تسجيل ريتشارد.
* يا ريتشارد الجابرك علي (البهدلة) دي شنو؟.
* خبر عاجل: السودبة بدأت.

الجنرال مصعبكو
06-30-2009, 12:10 PM
الله الله عليك انت يامبدع
والله مشكووووووووووووووووور علي المجهود الغالي ده
اعزرني الايامات الفاتت دي كنت مضغوط شوية
عشان كده ما قدرتة اساعدك
والله بجد اسف

m.sobhi
07-01-2009, 02:16 AM
عادي يا جنرالنا

وتسلــم على المرور

ود سنترا
07-01-2009, 02:25 AM
تسلمو يا حلوين علي المجهود الرائع وواصلو من غير ما تنقطعو

m.sobhi
07-01-2009, 02:52 AM
مشكوووووووور يا ود سنترا على المرور

m.sobhi
07-01-2009, 08:54 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg


قولوا ما شاءالله


الاندية الكبيرة اذا نظرت الي طاقمها الفني سوف تجد ان عدد الطاقم كبير بشكل ملحوظ ... واقرب مثال علي ذلك النادي الاهلي المصري الذي يملك جهاز فني وطبي ورياضي كبير.
* علي المستوي العالمي ايضا نجد ان اندية مثل ريال مدريد وبرشلونة ومانشيستر يوناتيد وغيرهم يملكون اجهزة فنية يقارب عددها من الجيوش الجرارة.
* الواضح ان اي مدرب كبير في العالم يطالب عند التعاقد معه بعدد كبير من اخصائي العمل الفني والطبي.
* فريق الهلال الان اصبح يملك جهاز فني وطبي كبير وهذا يدل علي الاتجاه نحو التجويد والاحسان في العمل.
* قد يكون في ذلك التمدد مشقة مالية علي الفريق وتكلفة قد ترهق مجلس الادارة كثيرا.
* ولكن في نفس الوقت فان ذلك العدد الكبير في الجهاز الفني للهلال دليل عافية ودليل قدرة مجلس الادارة علي الانفاق وعدم غل اليد وامساكها من الصرف علي الفريق.
* اضف الي ذلك فاننا اذا حسبنا التكلفة المالية قد نجدها لا تتجاوز كثيرا التكلفة المالية في المريخ.
* في المريخ هناك ترهل كبير في القطاع الرياضي وفي دائرة الكرة..لذلك فان الصرف غالبا ما يذهب في المريخ الي حيث لا ينفع الفريق.
* في الهلال نجد عكس ذلك.
* كفي ان بعثة الهلال ادريا في القاهرة يقودها مدير الكرة امين عبدالوهاب برفقة عبدالمهيمن .. ما دون ذلك لا يوجد اداريا مع الهلال وهذا حسن.
* معسكر المريخ الذي كان في الاسماعلية بدأ بتسعة لاعبين وربما كانت قيادة البعثة ادرايا يقودها عدد يقارب الي عدد اللاعبين.
* الهلال كما نشر ينتظر ويترقب وصول مساعد المدرب البرازيلي الذي ينتظر وصوله يوم الجمعة بعد غد.
* بوصول مساعد المدرب البرازيلي الجنسية يكون عدد البرازيلين في الجهاز الفني ارتفع الي ثلاثة.
* الجهاز الفني للهلال يقوده المدير الفني البرازيلي كامبوس وينتظر اضافة مساعد المدرب البرازيلي انطونيو في وجود مدرب اللياقة باهوس.
* هذا يرفع عدد البرازيلين في الهلال الي ثلاثة.
* مدرب الحراس في الهلال هو المصري المتميز السويركي .. علما ان جهاز الهلال الفني فيه من السودانيين عيسي الهاشماب وفتحي بشير وينتظر كذلك تعين مساعد مدرب سوداني يعمل الي جانب مساعد المدرب البرازيلي.
* اضف الي اولئك ان الهلال اصبح يمتلك كونسلت طبي مرافق للفريق ومع طبيب الفريق هناك اخصائي علاج طبيعي مع طبيب اخر ليرتفع عدد الاطباء في الهلال الي ثلاثة دكاترة.
* هؤلاء في الجانب الفني والطبي للفريق فقط.
* اما اذا تفحصنا جانب اللاعبين سوف نجد ان كشف الهلال فيه 6محترفين من اصول اجنبية.
* في الدفاع نجد المالي ديمبا ... وهناك من الكنغو امبيلي وكابوندي ومن نيجيريا ايفوسا وسولي شريف ومن زيمبابوي سادومبا.
* ذلك يعني بواضح العبارة ان الصرف المالي في الهلال اصبح كبيرا .. هذا الصرف لا يمكن تغطيته إلا اذا كانت هناك انتصارات متواصلة وبطولات مستمرة حتي نضمن تواجد الجماهير ومساندتها للفريق ماديا ومعنويا.
* المريخ عندما احضر وارغو بالصفقة الخيالية كان له ان يغطي تلك التكلفة ليس بالمؤتمرات الوهمية والرعايا الصورية .. وانما بانتصارات الفريق وباجادة اللاعب.
* لكن اللاعب في 7 شهور لم يسجل غير هدفين.
* نحن نترقب تدافع جماهيري خيالي للهلال في المباريات القادمة ويمكن كذلك ان يكون هنالك فئات رمزية للدخول لتمارين الهلال بعد النجاحات الكبيرة التي حققها تمرين الهلال الاخير قبل السفر للقاهرة وشهد تدافعا جماهيريا خياليا.
* يمكن جماهير الهلال ان تساهم بما تيسر لها وذلك بفتح المدرجات الشعبية للجماهير مجانيا في تمارين الفريق اما المقاعد الجانبية ومقاعد المقصورة وما يليها يجب ان يكون الجلوس فيها عبر رسوم رمزية.
* لا سيما وان جماهير الهلال سوف تكون مترقبة تمارين الهلال القادمة في ظل وجود طاقم فني يقوده العالمي كامبوس مع انطونيو وكامبوس.
* بل ان جماهير الهلال يمكن لها ان تستمتع حتي بتدريبات السويركي للحراس.. لأنها تمارين شيقة ومبتكرة.
* ما يهم هو ان مساهمة جماهير الهلال في دعم الفريق يجعل الانتماء اكبر للهلال ويمكن ان يحس اي مشجع انه شريك في الهلال وان كنا نعرف ان الجماهير هي المالكة اصلا للفريق بتشجيعها ومساندتها للفريق وبدعمها اللا محدود للفريق في المباريات بالدخول العالية التي تحققها جماهير الهلال.
* لكن المشاركة في التمارين ... يجعل للدعم طعما اخر.
* نعود ونقول ان الهلال الان عاد وتبدل جلده مرة اخري في يوينو وهو الذي كان قد تبدل في ديسمبر.
* الثبت ان تبديل جلد الهلال في ديسمبر الماضي كان للاحسن بدليل ان الهلال تصدر الممتاز بفارق 4 نقاط من الوصيف.
* كذلك يثبت حسن التبدل صعود الهلال لمرحلة المجموعات.
* الان بدل الهلال جلده مرة اخري بحثا عن المزيد من الاجادة.
* نسأل الله ان يكون ذلك التغير الذي حدث في الهلال موفقا ودلائله تشير الي ذلك ويبقي التوفيق من عند الله.
* التوفيق امر ليس يبد احد ... وليس امام الشخص غير الاجتهاد ونحسب ان ادارة الهلال اجتهدت وقدمت الدرر في فترة التسجيلات التي انتهت امس.
* عليه فاننا في الفترة المقبلة ننتظر اجتهاد جماهير الهلال في مساندة الفريق وتقديم العون المعنوي اللازم الذي يحتاجه الهلال في الفترة المقبلة للفوز بكل البطولات والكاسات المطروحة التي يشارك فيها الهلال.
* ملحوظة: خلوها علي الله.
هوامش
* الحمدلله ان الصفاء عاد بين جماهير الهلال والدكتور كمال شداد .. حتي ان جماهير الهلال اضحت تحمل صورة شداد مع صورة الارباب..(قد يجمع الله الشتيتين).
* مهم ان تكون علاقة الهلال مع الاتحاد قايمة علي الاحترام والتقدير المتبادل بين الطرفين.
* اخترعت جماهير الهلال مصطلح تشجيعي جديد للاعبها سادومبا .. حينما هتفت له : سا..سا..سا ...سادومبا.
* تخيلوا ذلك الهتاف يوم 17 يوليو.
* امير دامر بطلب الغيار قبل المباراة ما تبدأ.
* انا اول مرة اشوف لي مدافع يرفع ايدو للمدرب طالب الغيار من التسخينة.
* يا امير دامر اصبر ... خلي الساعة الاولي تفوت من الشوط الاول ... ما تحرجنا مع ناس الـ art .
* صلاح ادريس في الاذاعة الرياضية طالب برفع كشوفات الاندية الي 40 لاعبا.
* يا صلاح ادريس لو الاتحاد استجاب لطلبك هذا ... الكشف بتاع الهلال إلا تتمو من الصين الشعبية.
* 40 لاعب يجبوها ليك من وين في البرد دا؟.
* ناس المريخ 28 لاعب ما عارفين يعملوا معاهم شنو؟.
* ناس المريخ ... اعترضوا علي ارجاع صالح عبدالله من المطار .. وهم يا حسرة رجعوا باولينو من البرازيل.
* يمكن يكونوا فاكرين ... البرازيل اقرب من المطار.
* او يكونوا فاكرين ... المطار ابعد من البرازيل.
* عشان كدا اعترضوا.
* اي حاجة جائزة من ناس المريخ.
* ايداهور عاد تسجيله للمريخ ... الحمدلله الهلال اتخلص من نيجيري اخر كان يمكن ان يتسجل في الهلال.
* امس كامبوس قال شاف المريخ ... قال الفريق دا بيلعب وين؟.
* وقت عرف فريق المريخ بيلعب معانا في مجموعة واحدة مع الهلال كان عاوز يفض المعسكر.
* قال ما في داعي.
* المعسكر لزومو شنو؟.
* ان بقي دا فريقكم يا ناس المريخ ..يا ناس الهلال تعالوا ساكت.
* المريخاب قالوا ود عم ماردونا شرف افتتاحية سيكافا.
* انا اول مرة اشوف لي افتتاحية بعملوها بعد المباراة الاولي.
* دي زي الحنة البعملها العريس بعد عشر سنوات من زواجه.
* بعدين حكاية ود عم ماردونا الفرحانين بيها دي شنو؟.
* لو سمعكم صلاح ادريس بجيب ماردونا ذاتو عشان يشوف تمرين الهلال ويرجع.
* انتوا تعالوا هنا... ناس الارجنتين ديل ذاتهم ما عندهم قرابة بالاسم دا.
* لو دا ود عم ماردونا ... كرتو وين؟.
* شكرا للمريخ الذي قدم خدمة كبيرة للهلال عشان كامبوس يشوف كل صغيرة وكبيرة في المريخ.
* خلاص الموضوع دا بالنسبة لينا انتهي.
* الهلال الجديد متاح فقط للجمهور.
* ناس المريخ قالوا ارتاحوا من حكاية الهلال من داخل ارض الاحلام ... بعد خروج الهلال من دريم لاند.
* الحكاية دي كانت عاملة ضيق لي ناس المريخ.
* مفروض المريخ ما يخرب طبعوا بي بطولة سيكافا دي.
* عارفين ليه؟.
* عشان هو بعد 16 يوم ح يشارك في مرحلة المجموعات .. والفرق سوف يكون واسع.
* اقول ليكم حاجة.
* قول لينا حاجة غير النجيلة.
* النجيلة قدمت للجامعة.
* النجيلة دي منو؟.
* النجيلة بنت بنت المني.
* خبر عاجل: ديالو عرفها.

نصار
07-01-2009, 11:56 AM
محمد عبد الماجد دا مجنون ما نصيح
غايتو بكتل ليهو مريخابي بالمغصة

m.sobhi
07-01-2009, 12:57 PM
محمد عبد الماجد ده بعد يوم 18 حيحجز جريده قوون كلها عشان يوريهم المغصه الما بيعرفوها

alzamzami
07-01-2009, 01:40 PM
محمد عبد الماجد ده بعد يوم 18 حيحجز جريده قوون كلها عشان يوريهم المغصه الما بيعرفوها



هههههههههههههههههه

منتظرين والله بي فارغ الصبر

m.sobhi
07-02-2009, 01:50 AM
ههههههههههههههه والله الهلالاب ديل حقارين جدا

خلاص هانت باقي 15 يوم

m.sobhi
07-03-2009, 08:38 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg

الكفكفونا


الكفكفونا دي حاجة زي (الفطاير)..... زي الزول البكون طالع مستعجل شديد ... يلاقي زول في طرف الشارع يقول ليه : (انت امس حضرت النشرة الجوية).
* يقول ليه: ابدا ... فيها شنو؟.
* تتخيل ما فيها اي حاجة.
* الكفكفونا دي اقول ليكم زي شنو؟.
* زي الزول البكون نائم ..تلفونو يضرب .. يقوم يمشي عليهو .. وقت يصلو ..يكتشف التلفون الضارب دا تلفون الجيران.
* الغريبة نفس النغمة.
* لو مشيت الصين .. ما تغلط وتعمل ليك شريحة تلفون.
* قالوا التلفون وقت تحفظ رقمو .... ترجع السودان.
* قول حفظت الرقم وجاتك مكالمة.. ح تفهم شنو يعني.
* مرة واحد مشي الصين ... وقعد في (طوكيو).
* .............
* ما تضايقوا انا عارف طوكيو عاصمة اليابان ... لكن اعمل ليكم شنو للغلطة المطبعية دي.
* بكين طارت من رأسي.
* الزول دا مشي طوكيو عمل ليهو شريحة ....
* اليوم الاول ما في زول ضرب ليه.
* اليوم التاني ما في زول ضرب ليه.
* شهر ما في زول (مسكل) ليه؟.
* بعد شهر تلفونو ضرب.
* صاحبكم قال : يا ربي دا منو الصيني المفتح العرف رقمي دا.
* فتح التلفون .. دخلت المكالمة ... ما فهم اي حاجة.
* الزول البي غادي يطرش في الصيني طرش.
* يا ود الناس عاوز منو؟.
* والزول داك يطرش في الصيني.
* اخر حاجة قال يتخارج من الزول دا بطريقة ظريفة ..قال ليه : (اسمع يا ابو الشباب النمرة غلط وقفل التلفون).
* الكفكفونا ... حاجة قريبة من الشيء دي.
* زي شنو اقول ليكم.
* الحكاية دي زي العريس ..الموبايلو اليوم كلو في الشاحن من كترة المكالمات.
* كل مرة الموبايل يضرب : (اسمع انت وين؟... العيش قطع).
* ما في مشكلة برسل ليكم عثمان يشوف ليكم موضوع العيش دا.
* دقيقة ..دقيقتين ... التلفون تاني يضرب : (اسمع انت بتروح وين وتخلي الناس ... التلج انتهي).
* ما في مشكلة برسل ليكم احمد يشوف ليكم موضوع التلج دا.
* شوية ..شويتين ..تلفون العريس تاني يضرب: (انت وين يا زول ؟... الفحم دا عاوزين ليهو زيادة).
* ما في مشكلة ... برسل ليكم الطيب يشوف ليكم موضوع الفحم دا.
* بعد شوية التلفون تاني يضرب: (انت عريس شنو؟..البتفوت وتخلي الناس ...الكهرباء دي انتهت).
* ما في مشكلة برسل ليكم الحاج يشوف ليكم موضوع الكهرباء دي.
* تاني يضربوا ليه : (يا زول انت وين من الصباح ؟... عماتك ديل قالوا ما جبت ليهن الجبنة).
* ما في مشكلة ... بجيكم عمر هسع دي ويجيب ليكم البن.
* صاحب العريس بشوف العريس بالطريقة دي من قبل شهر من العرس ...يقول ليه : (يا زول انت الجابرك شنو علي التلتلة دي اقفل التلفون وارتاح في عضمك دا).
* العريس يقول ليهو : (قلت كدا... اها التلفون دا قفلنا).
* خمس دقائق ما تقوت علي الكلام دا...الباب يدق ... العريس يمشي يفتح الباب يلقي عباس شائل ليهو (قفة).
* خير في شنو؟.
* ما في حاجة ..بس خالاتك ديل قالوا ليك عاوزين لينا (سلطة بيضا).
* العريس يعاين لي صاحبو .. ويقول ليهو :تقول لي اقفل التلفون ... وتجيب لي الهوا ..لي عندي.
* افتح التلفون ... اصلي ما ناوي اكرر العرس ... كلها عرسة واحدة في العمر.
* والكفكفونا ...دي زي (الكبريت) ...اليوم كلو بتقع في عينك ...من الكهرباء تقطع ..تفتش الواطة دي فوق ..تحت ما تلقاها.
* او زي الدكان البتمشي ليه الساعة 11ليلا ...تقول ليهو عاوز لي فول وعيش.
* يقول ليك في فول بس ..عيش مافي.
* بكرة تمشي ليهو الساعة سبعة مساء تسألو نفس السؤال...يقول ليك في عيش ..لكن فول مافي.
* يا ود الناس انت العيش دا ما بتجمعو مع الفول ........ المشكلة شنو في الحكاية دي..عشان تبيع كل حاجة براها.
* تمشي للدكان تاني ..تقول ليهو:في جبنة.
* يقول ليك :جبنة مافي ...لكن عندنا صابون غسيل جديد جبنا امس.
* صابون في عينك.
* ما يهمنا الان ان الهلال اتجه الي (الكفكفة) وكفكف كل الحروف ..ربما ذلك كان نسبة لأن الهلال يعزم الفوز ببطولات (الكاف) هذا العام.
* استبدل الهلال نظام الـ (دي) ..وبعد ان كان في الهلال مدرب برازيلي اسمه (دي سانتوس) ..اصبح هناك مدرب برازيلي اسمه (كامبوس).
* شفتوا الكاف دي كيف.
* دي سوزا ... جاء بدلا له كابوندي.
* اي حاجة نحن عندنا بي نظام.
* من قبيل بقول ليكم في الكفكفونا وانتوا ما صدقين.
* امولادي ذاتو كان في ناس بقولوا ليهو دي امولادي ..عشان كدا سادومبا دي مفروض حسب التوزيع الحرفي في الهلال يكون اسمو كادومبا.
* لكن جماهير الهلال عشان تكف العين قالت : سا..سا..سا..سادومبا.
* علي العموم نحن نردد قول امرؤ القيس حينما قال:
وكاف وكفكاف وكفي بكفها
وكاف كفوف الماء من كفها انهمل
* السنة دي ان شاءالله نحن ابطال كل بطولات (الكاف).
* ملحوظة : نبدا بالكاف ونختم بالفيفا.
هوامش
* المريخ فاز بالستة ........فاكد ضعف سيكافا.
* فريق يتغلب من ثامن الدوري المصري بالثلاثة ويأتي ويغلب في سيكافا بالستة.
* ريتشارد ...نال جزاء كتابة ابداء رغبة للعب في المريخ.
* ابداء رغبة عملت فيهو كدا ... طيب التوقيع رسميا يعمل فيه شنو.
* المريخ مازال متأثر من سباعية الوحدات الاردني ومازال المريخ يشكي ويعاني من (البرد) الذي كان سبب خسارته في الاردن.
* عشان كدا المريخ سجل ليهو لاعب اسمو كريم (الدافي).
* الدافي عاوز يحلكم يا مريخاب.
* وارغو في سيكافا فشل في التسجيل.
* غايتو يا وارغو لو ما سجلت في سيكافا دي إلا نعمل ليك دورة في القرية.
* انتوا كلتشي رجع من امريكا.
* يكون رجع ... في واحد بشبهو في المريخ كان لاعب اول امس.
* بقيت ما زي زمان يا كلتشي.
* والله مع ناس امبيلي وسادومبا ديل ..لو كنت بتلعب انت وطمبل في الهلال كان كامبوس دا لعبكم (باكات).
* الواحد بقي كل ما يشوف هجوم المريخ ...يتبسط.
* الله مرق الهلال.
* انا ما عارف نحن كنا صابرين عليكم كيف؟.
* كنتوا كاتلننا بالكشافات.
* كشافات الهلال ارتاحت في عضمها.
* عبر الاستاذ رمضان احمد السيد وصلني هذا (الاقتراح) من نايل وهو يقول فيه ( زي ما في فرق ناشئين وشباب ومراحل سنية ..اقترح يكون في عواجيز الهلال..هسع يقولوا قاصد المريخ).
* (هسع دا اقتراح دا).
* وارغو شكلو ..بقي سيكافا ..سيكافا.
* ناسكم ديل بتسوكفوا ليكم ساكت.
* هسع يكونوا ما عارفين يتسوكفوا يعني شنو؟.
* سيكافا دي ريحتها حمام حمام.
* اضربوا الحمام دا ... عشان نجي نقتص ليهو يوم 17 يوليو.
* فرق سيكافا دي في الحمام ... حمام عندو انفلونزا الطيور.
* كامبوس شاف المريخ ..قال ما في داعي للفيديو.
* جنس مذاكرة.
* يوم 17 يوليو ..مراقب المباراة اول حاجة يعملها مفروض يعد لينا الكراسي.
* عشان ناس المريخ بعد المباراة بقولوا فقدنا ثلاث نقاط واربعين كرسي.
* خلف الله ابومنذر ..عاوزنو يوم 17 يوليو يحرس لينا غرفة الحكام.
* ان شاءالله يا خلف الله تجينا من امريكا عشان الغرض دا.
* خبر عاجل: قالوا النجيلة اتغابت العرفة في (السور).

m.sobhi
07-04-2009, 11:24 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg


11سبتمبر يوم 18يوليو



* المطلوب من اعلام الهلال في هذا التوقيت ان يقلل من الجرعة الاعلامية الممنوحة للفريق..مطلوب ان تكون مباريات الهلال وتمارينه بعيدة عن تلك التفاصيل الدقيقة.
* مطلوب ان نقتصد في التناول الاعلامي.
* لا نقصد بذلك ان ندس اخبار الهلال او نمنعها ... ولكن نحب ان نترك الخيار للجماهير لتقييم فريقها بنفسها ..فليس هنالك ضررا علي الفريق اكثر من الانطباع الذي يتركه الاعلام للجمهور.
* لا ننكر اننا مددنا افراحنا عريضة .. وكتبنا وكتب الاخرين الكثير عن الهلال الجديد وعن تسجيلاته الموفقة باذن الله.
* نحن نثق ثقة عريضة ولا اقول عمياء في ان الهلال سوف يكون عند الوعد به ان شاءالله بدرا لا تنكره العين...لكن مع هذا فلتكن تلك التباشير في خفوت.
* مطلوب مننا في هذا التوقيت والهلال مقبل علي مباراة القمة في 18يوليو ان نكون اكثر عقلانية ..لأن الانتصارات والبطولات تضيعها الثقة اذا تحولت الي غرور.
* ونحن نذنب دائما في بناء اساطيل للفرح.. والفرح قد تغلب مساويه.
* نخشي وسط كل هذه التفاؤلات ان نبلغ الغرور دون ان ندري ..فنأتي لمباراة القمة ونحن لا نملك للمباراة غير تلك (الطمأنينة) الكبيرة.
* مباريات القمة دائما يكون الانتصار فيها للفريق الذي يكون صاحب الاضاءة الاعلامية الاقل ..اي ان الفريق الذي تسلط عليه اضواء الاعلام بكثافة يخسر.
* انا سعيد بما آلت اليه بطولة سيكافا وما تسببت فيه لتمنح المريخ جرعات اعلامية اعتقد انها سوف تضر بالفريق كثيرا في مواجهة 18 يوليو.
* انتصارات المريخ الان علي فرق قادمة من روندا .. وفرق قادمة من جيبوتي سوف يخدع المريخ كثيرا.
* غير ذلك فان الانتصار بستة اهداف ..امر جد (مضلل) ... لذلك فان من مصلحة الهلالاب ان يشايعوا المريخاب في هواهم، وان يجعلوهم يصدقوا اوهامهم.
* اجعلهم يصدقوا ان بطولة سيكافا بطولة قوية جدا .. وهي رغم انها بطولة اقليمية إلا انها تتفوق من الناحية الفنية والناحية المادية والجماهيرية علي بطولة الاندية الاوروبية للابطال.
* ان صدقوا منكم هذا ..يكون هو المطلوب.
* انتوا (خسرانين) حاجة يا هلالاب ... ما كعبة معاكم ..قولوا ليهم سيكافا قوية .. وجميلة ..ورائعة.
* ان شاءالله يصدقوا بس.
* قولوا ليهم ان اتراكو الرواندي مثل ريال مدريد.
* يلا ان شاءالله ما حدش حوش.
* وقولوا ليهم ماتاري يونايتد الكيني كورتو زي مانشيستر يونانتد .. هو الكلام بي قروش يا عالم.
* وعشان يرتاحوا للاخر قولوا ليهم كارتيلا الجيبوتي احسن من تشيلسي.
* ابسط يا عم.
* نحن عارفين ان هذا الفريق لأول مرة يلعب خارج جيبوتي .. لكن المريخاب الحتة دي ما شغالين بيها.
* مازيمبي الكنغولي هو ذاتو طلع زي (الارسنال).
* قولوا ليهم كدا.. خلوهم ينوموا في العسل.
* احتمال بطولة سيكافا دي يفوز بيها فريق بنادير تيليكوم الصومالي..انا الفريق دا شايفو احسن فريق بيلعب كورة في سيكافا.
* مع الاعتذار طبعا لحي العرب.
* انتوا بطولتكم دي اصلو ما فيها مفاجآت.
* من زنزبار مشارك فريق ميامبيني ... غايتو جنس اسماء ..انتوا يا المريخاب (الحمام) دا بتجيبوا من وين؟.
* الحمامة ..براها (تنضبح) ..وبراها تتطلع (ريشها) .. وبراها (تتحمر) .. وبراها (تتكرفس).
* انتوا عليكم تضربوا بس.
* اتذكرت ... نحن ما قلنا سيكافا دي بطولة قوية.
* مالك عاوز ترجع تاني.
* من تزانيا طبعا مشارك فريق (السجون).
* اها السجون دا بالذات احسن من ليفربول ..بلعبوا كورة حديثة وممرحلة.
* الكورة الممرحلة عيشتها تتطير.
* سيكافا دي مفروض تنظموها في رمضان .. وتلعبوها بي كورة الشراب.
* بطولة تراثية.
* الفاول لسع في سيكافا .. نوع الفاول القديم داك ..الفاول الاثري ... نوع الباك البمسك الفانلة.
* الجدعة في سيكافا الي الان بيلعبوها بي ايد واحدة.
* المخالفة طبعا بنفذها (الاستوبر) ..اي مخالفة تحصل في اي حتة ..الاستوبر عليه ان ينفذها.
* مع ذلك نؤكد ان البطولية قوية خالص.
* يا مريخاب ما تشتغلوا بي كلام الهلالاب دا.
* ناس الهلال ديل في بطولة القارات عندهم رأي.
* اخرج من ذلك .. واكرر اننا في الايام القادمة يجب ان نقلل الجرعة الاعلامية علي الهلال والاجمل ألا تكون هناك في الاصل جرعة.
* مدرب الهلال الجديد يحتاج ان يجرب وان يضع خططه بعيدا عن الاعلام وبعيدا عن هذا التناول الكثيف للهلال.
* جميل ان نترك سادومبا بعيدا عن الصحافة الرياضية ...اتركوه هكذا دون ان تقدموا عنه تحليلا يقول اين سيلعب وفي اي خانة سوف يضعه المدرب وكيف ستكون تحركاته.
* طبعا من المتوقع في الايام القادمة ان يكون هناك تناول اعلامي كبير للاعب الهلال سادومبا .. وهذا امر سوف يضر باللاعب.
* كذلك من الافضل ان نترك كابوندي ..ونترك حتي التقارير التي تتحدث عن نجومية هذا واخفاق ذاك .. واصابة ذا.
* لا نريد لجماهير الهلال ان تبني قناعاتها مما تقرأ ..فكم لاعب ميزه الاعلام وقدمه ففشل وكم لاعب تجاوزه الاعلام واهمله فنجح.
* اعتقد ان من مسببات فشل وارغو الاولي هو ما كتب عنه من قبل الاعلام المريخي ..لتأتي جماهير المريخ فتشاهد لاعب لا يحسن غير الاحتجاج علي قرارات الحكم.
* لاعب بعطيك احساس الي انه مازال بحسب في حافز التسجيل.
* حافز التسجيل في عينك.
* عين منو في البرد دا؟.
* لكن مع ذلك هل تصدقوا ان اعلام المريخ يريد ان يقنع الكل ان وارغو عبقري زمانه وان هذه التمريرة العادية التي يلعبها لا يلعبها إلا ميسي.
* ميسي عيشتو تطير.
* وان هذه المخالفة التي ارتكبت مع وارغو اشبه بتلك المخالفة التي ارتكبت مع ماردونا في كاس العالم 1987.
* طبعا في الاساس ما في كأس عالم سنة 1987...اها عاوزين تغالطوا.
* نحن نعمل شنو مع اعلام المريخ.
* ومثلما بني اعلام المريخ قصور في الرمال للاعب اسمه وارغو نجد ان اعلام الهلال ايضا شارك في بناء قصور مماثلة للاعب اسمه دي سوزا.
* لكن نحمد لاعلام الهلال انه لم يكن متحمسا لاللاعب امولادي وكانت هناك تحفظات حول اللاعب .. واذكر هنا توصيات الاستاذ الرشيد علي عمر علي سبيل المثال ،عندما اوصي بعدم تسجيل امولادي وصرف النظر عنه.
* غير اني اعود واخشي علي كابوندي وسادومبا مما يكتب حولهما ..مع ايماننا الكامل وقناعتنا بنجاحهما وبتميزهما ولكن (التوفيق) امر ليس بيد احد.
* لذلك اتركوا جماهير الهلال تحدد وحدها وتقييم وهي افضل من تقييم وافضل من تمنح الدرجات.
* اضف الي ذلك فان الضغط الاعلامي لا نريده ان يكون قويا علي اللاعبين وعلي المدرب الجديد الذي سوف تكون مباراة القمة اول مباراة له بشكل رسمي.
* دعونا نقول ان الهلال خسر من فريق النسور جبل اولياء.
* روجوا لتلك الخسارة.
* وان الهلال تعادل مع الشرطة الامنية.
* اشيعوا بين الناس هذا التعادل.
* دعونا نقول ان الهلال تعادل مع الانتاج الحربي الفريق الذي خسر من المريخ.
* هذا افضل لنا.
* وتذكروا ان المريخ فاز علي بطل رواندا بستة اهداف .. وفاز علي بطل جيبوتي بستة اهداف ايضا.
* هذا افضل اعداد لنا للقاء القمة .. وهذا هو طريقنا للانتصار ان شاءالله علي المريخ في مواجهة 18 يوليو.
* اعتقد ان (سيكافا) اعداد جيد للهلال ..حسب تصريحات كامبوس الذي نحسب انه شرب المريخ شراب من خلال هذه البطولة المباشرة التي يتابع مبارياته مدرب الهلال في الغرف المغلقة ..لا سيما وان مدرب الهلال (كان) لا يعرف شيء عن المريخ.
* لذلك فان سيكافا اعداد جيد للهلال.
* الاهداف التي سجلها المريخ في بطولة سيكافا اغلبها اهداف ناتجة من الارسال الطويل وقد قال حسن المصري ان اهداف المريخ تغيب عنها الرؤية التكتيكية.
* كذلك فان مدرب الانتاج الحربي طارق يحي قال ان الهلال يتميز باللعب الجماعي واللعب المنظم..وهذا شيء حسن.
* مع هذا فاننا نفضل ان نتجاوز تلك المحسنات ... والافضل ألا يقدم اعلام الهلال في هذا التوقيت بالتحديد قراءة لمدرب شاهد الهلال.
* من اوراق الهلال الرابحة التي سوف يلعب بها الهلال في 18 يوليو ان الجميع لا يعرف بي اي طريقة سوف يلعب كامبوس.
* واي تشكيلة سوف تمثل الهلال في لقاء القمة.
* هل سيلعب كامبوس بثلاثة مهاجمين ..ام يكتفي بالثنائي.
* الثنائي نفسه من يكون ..هل سيكون كاريكا وروني وخلفهما امبيلي ..ام سيكون الثنائي امبيلي وسادومبا (بعد ان تكتمل مراحل تسجيله واعتماده في الكشف الافريقي).
* قد يلعب خليفة في الطرف اليمين .. وقد يلعب سادومبا وربما يعود مساوي كلها احتمالات واردة.
* في الوسط ايضا هناك خيارات عديدة .. هل سيلعب عمر بخيت ومهند وهيثم ... ام هيثم وعمر وايفوسا ... ام يلعب الاربعة ..ام يأتي مساوي فيحجز موقعه اولا. وربما يدخل حمودة فيقلب التشكيلة ..وهناك النعيم وسولي شريف كلها احتمالات راجحة.
* الاتفاق فقط يبقي في الطرف الشمال الذي سوف يلعب فيه كابوندي (اذا اكتمل قيده افريقيا) .. كذلك هناك اتفاق علي ثنائي الدفاع سامي عبدالله وديمبا وفي حراسة المرمي المعز محجوب.
* نسأل الله فقط ان يبعد الله الاصابات من لاعبي الهلال ليحتفظوا بجاهزيتهم وليقاتهم كاملة للقاء القمة.
* الذي اتوقف عنده وسوف اشار اليه كثيرا هو ان الهلال عليه حصاد النقاط التسع في مواجهاته الاولي التي سوف تكون بام درمان.
* الفوز بالنقاط التسع في الجولات الثلاثة الاولي للهلال سوف يجعل الفريق مرتاحا وسوف يكون الهلال ضمن الصعود لدور الاربعة ان احسن في الفوز بالنقاط التسع ان شاءالله.
* لذلك فان علي عاتق الهلال يقع هم الفوز بالنقاط التسع .. والتسع نقاط هي هدف واحد للهلال ..لا نقبل في تلك النقاط فصال او جدال.
* الشيء الذي سعدنا له هو ما نشرته صحيفة قوون امس وهي تورد تواريخ مواجهات الهلال حيث اختار الاتحاد الافريقي للهلال يوم (الجمعة) موعدا لمباريات الهلال وهذا نسحبه خيرا لنا ..لأن الهلالاب يتفاؤلون بيوم الجمعة ومن دون شك ان سعادتهم تبقي كبيرة في حال انتصارهم في ذلك اليوم المبارك.
* كذلك سعدنا ان تم اعتماد يوم 18 يوليو موعدا لمباراة القمة ..وان كان تاريخ المباراة يصادف (السبت)، باعتبار ان المباراة تقام في ملعب المريخ. إلا ان يوم (18) يوم يذكرنا رقمه باشياء جميلة ... والرقم 18 من الارقام المحببة في الهلال.
* عليه فان يوم 18 يوليو سوف نعتمده نحن في الهلال يوم 11 سبتمبر وهو اليوم الذي ضرب فيه البنتاجون .لاسيما وان مباراة القمة في استاد المريخ والمريخ اعتاد ان يخسر في ملعبه من الهلال.
* المصادفة العجيبة ان مباراة القمة الثانية في البطولة الافريقية سوف تكون فعلا في يوم الجمعة 11 سبتمبر في استاد الهلال ..وهذا التاريخ يصادف شهر رمضان المعظم.
* 6 نقاط وطلعت.
* لكن قبل ذلك التاريخ ..مهم ان ينتصر الهلال في المواجهة الاولي التي سوف تكون في يوم السبت 18يوليو باستاد المريخ.
* ومهم ايضا ان ينتصر الهلال في المباراة الثانية والتي سوف تكون في ملعبه يوم الجمعة 31 يوليو والتي سوف يواجه فيها الهلال فريق زيسكو.
* نتمني حتي ذلك التاريخ ان يكون العمل اكتمل في تأهيل استاد الهلال لتكون المباراة كرنفال خاص للهلالاب.
* مواجهة الهلال الثالثة في البطولة الافريقية ايضا سوف تكون في استاده وسوف تلعب في يوم الجمعة 14 اغسطس امام كانو.
* عليه فانه لنا باذن الله وتوفيقه ان نعتمد 9 نقاط في بنك الهلال.
* بعد هذه الجولات سوف يغادر الهلال الي نيجيريا ليلعب امام كانو في يوم الاحد 30اغسطس.
* بعدها يلعب الهلال في استاده امام المريخ في مواجهة 11 سبتمبر.
* افتكر ان التاريخ وحده كفيل بان ينسحب المريخ ويعلن الهروب مبكرا ..لا سيما وان اللقاء سوف يكون في استاد الهلال.
* انتوا يا مريخاب ما عارفين (نجيلتنا).
* سادومبا وامبيلي وكابوندي وايفوسا وديمبا ونجيلة.
* القاعدين ليها شنو؟.
* يا ود الناس ...انتوا ما قلتوا عاوزين (تلبدوا).
* تلبد في عينك.
* ملحوظة: النجيلة (مرة تفرح ومرة تسرح ومرة تغلبها القراية).
هوامش
* سيكافا اعداد جيد للضل.
* مطلوب من ادارة نادي الهلال اكمال اعتماد اعارة سادومبا ..الذي مازلنا ننتظر كرته من جنوب افريقيا.
* الكرت مالو عاوز يبقي زي (السياج).
* مباراة القمة تبقي لها 14 يوما.
* اسبوعان يعني ..ونشوف (البتسوكفوا) ديل.
* الاندية التي تلعب في سيكافا قالوا اول مرة يلعبوا في (الاضاءة).
* الفاصل الزمني بين نهاية سيكافا ومباراة القمة في البطولة الافريقية فاصل ضيق...بمعني ان المريخ سوف يكون مرهقا في مباراة القمة اذا بلغ نهائي سيكافا.
* اضف الي ذلك احتمال الاصابات وارد بقوة في النهائي.
* كان قرار حكيم من مجلس الادارة ومن الجهاز الفني للهلال بعدم المشاركة في سيكافا.
* لو شارك الهلال في سيكافا كان الهلال قتل شوق جماهير الفريق لرؤية الهلال.
* الناس الان منتظرة الهلال زي هلال العيد.
* لذلك من الافضل ان يتأخر الهلال لبعض الايام في مصر ..خشية من التدافع الجماهيري الذي ربما يؤثر في اعداد الفريق وفي تركيز اللاعبين.
* من الافضل ان يعود الهلال قبل سبعة ايام من لقاء القمة.
* سادومبا يمكن ان يكون افضل بديل في مباراة القمة.
* كان كامبوس محتاج الي قراءة المريخ في اكثر من مباراة ..وذلك لحداثة كامبوس في تدريب الهلال ،اضافة الي ان الجهاز الفني للهلال من غير مساعد مدرب وطني (يعرف اجواء مباراة القمة).
* اذا كان الهلال في معسكر مقفول في مصر ..فان جماهير الهلال يجب ان تكون في معسكر داخلي بالسودان لمساندة الفريق ولتشجيعه سعيا للوصول الي دبي.
* ايفوسا يمكن ان يكون الكرت الرابح في مباراة القمة ... وعند ايفوسا الكثير ليقدمه للهلال ... وعنده تحدي خاص في مباراة القمة القادمة.
* اول خسائر سيكافا ... اصابة طمبل.
* الله يستر علي ركبة سفاري.
* بالمناسبة ...كلموا سفاري وقولوا ليه :اعمل حسابك من الاصابات.
* امبيلي واضح انه اخصائي تقكيك وتركيب (ركب).
* شايف امير دامر ..بقي يتحسس.
* يتحسس مين يا عم؟.
* نبحث عن مباراة اعدادية للهلال يخسر فيها.
* الخسارة احسن في هذا التوقيت.
* اذا كان ليس في الامكان تسجيل غسان ..نرجو الابقاء علي صالح عبدالله.
* لا يعقل ان يشارك في معسكر الهلال لاعب غير مسجل في الفريق ويبقي صالح عبدالله اللاعب المسجل في الخرطوم دون ان يشارك في الاعداد.
* وهناك يوسف التاج الذي لم يعتمد تسجيله.
* النجيلة دخلت الجامعة.
* خبر عاجل: اخبار دي سوزا شنو في نيجيريا.

m.sobhi
07-06-2009, 02:38 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg

طول بالك ..انت في مومباي


يخيل لي ان اكثر حركة واكبر نشاط في الدنيا موجود في (مومباي).. الهنود خلاقين للفوضي الجميلة ..عندهم شغب في المشاعر وشغب في الاحاسيس وشغب في الاشواق.
* وهذه اشياء تؤدي الي الابداع.
* تلك افتراضات تصنع (الدهشة).
* اذا كانت (الهند) بطابع اهلها بلد متحركة فان قمة تحركها يوجد في (مومباي).
* مومباي مدينة ضاحكة.
* مومباي قالوا انها مدينة بينك وبين رمشك يوجد الف زول.
* مدينة من الزحمة قالوا الركشة فيها بتشيل مية.
* قيل ان سوداني ذهب الي الهند ..وبلغ مومباي فاراد ان يستقر في تلك المدينة فخرج يبحث عن (بيت) ليسكن فيه بالاجرة.
* طبعا السوداني لموا فيه (سماسرة) هنود ..كل يوم يجيبوا ليهو بيت ..ويقولوا ليهو : بس البيت دا فيه مشكلة صغيرة.
* مشكلتو شنو؟.
* مشكلتو الغرف حقتو ما فيها (سقف).
* بيت بدون سقف اعمل بيه شنو؟...عاوزة استديو....بيت هو وإلا مسرح.
* قلت ليكم السماسرة هنود.
* بعد يومين الجماعة تاني يجبوا ليهو بيت.
* قبل ما يستلم المفتاح ..يقولوا ليهو :بس البيت فيه مشكلة صغيرة.
* مشكلتو شنو؟.
* مشكلتو البيت (مسكون).
* قلت ليكم هنود ..قعدتوا تغالطوا.
* بعد 72 يوما ...تاني الجماعة يجيبوا ليهو بيت.
* قبل ما يدخل في البيت ..يقولوا ليهو :البيت بس فيه مشكلة بسيطة.
* مشكلتو شنو؟.
* مشكلتو انو البيت دا بشطب بعد اربعين سنة ...لكن صاحب البيت عشان محتاج للقروش ..ممكن يأجر ليك غرفة من هسع دي.
* قلت ليكم هنود.
* خلاص يا الهلالاب ...عاوزين تخلوا اي حاجة وتقبلوا علي الهنود.
* المهم في النهاية ... الهنود السماسرة ..لقوا ليهم (بيت) للسوداني ..طوالي مشوا عليهو.
* قالوا ليهو :لقينا ليك بيت ... لقطة بس ... حوش وبرندة و9 غرف ..وسطوح ومكيفات ..وصاحب البيت ما عاوز في البيت اي مقدم.
* السوداني ما صدق ..قال للهنود :دا لقيتوا وين؟...اخيرا ح اسكن في مومباي ..مدينة السحر والجمال والروعة وصناعة السينما.
* السوداني مستعجل طبعا ..قال للهنود اها البيت وين؟...عشان نمشي عليه.
* السماسرة الهنود قالوا ليهو : بس البيت فيه مشكلة صغيرة..مشكلة بسيطة خالص ..ما بتأثر في البعد السيكلوجي للسكنى.
* السوداني كرفس وشيه ..قال ليهم : مشكلتو شنو؟.
* قالوا ليهو: مشكلتو انو بعيد.
* السوداني قال ليهم البعد ما مشكلة ... ان بقي علي البعد تبقي المشكلة بسيطة.
* الهنود سمعوا كلام السوداني وانبسطوا ليك في الدنيا دي جنس انبساطة..وقالوا للسوداني :اها نمشي علي البيت.
* السوداني ما كذب ...قفل تلفونو وقال ليهم :يلا علي البيت.
* اها الهنود دا يدخلو بالسوداني دا من شارع لي شارع ...لفوا بيهو في الدنيا دي جنس لف.
* السوداني كل ما يعترض علي حاجة...الهنود يقولوا ليهو : من البداية قلنا ليك البيت بعيد شوية.
* جماعتك ماشين وماشين .. اخر حاجة السوداني قلق..قال للهنود انتوا بيتكم دا وين؟.
* الهنود قالوا ليهو : البيت في الكلاكلة.
* انتوا كمان عندكم كلاكلة في مومباي.
* الهنود قالوا ليهو : ابدا ... نحن البيت لقينا ليك في الكلاكلة بتاعة السودان ... وافتكر من البداية نحن قلنا ليك البيت بعيد شوية.
* السوداني قال ليهم : لكن دا ما بعيد شوية ... دا بعيد خالص.
* الهنود قالوا ليهو: يا زول لو ما عاوز البيت دا تاني ما بتلقي بيت اقرب منو... انت ما عارف العالم بقي قرية ...الزمن دا ما في حاجة بعيدة.
* بعدين البيت دا في 57 هندي منتظرينو .. والله نحن خايفين نمشي نلقاه سكنوه.
* انت يا ود الناس قايل الصينيين الساكنين في السودان ديل كلهم شغالين في السودان ... الجماعة ديل فيهم جماعة شغالين في الصين ..بس عشان الصين زحمة سكنوا في السودان.
* المهم السوداني السماسرة الهنود اقنعوه ليك ... المسكين اشتغل في مومباي ...وسكن في الكلاكلة.
* الزول دا بقي تلقاه واقف في شارع الكلاكلة من الساعة خمسة صباحا .. الكماسرة يؤشروا ليهو للسوق العربي والميناء البري.. وهو يؤشر علي فوق...بأشر علي السماء.
* كل يوم كان بعمل كدا ..كل يوم كان بأشر علي فوق.
* يوم في سواق استفزتو الاشارة ... وقف ليهو ..قال ليهو تعال هنا انت كل يوم بتأشر علي فوق .. ماشي وين انت؟.
* صاحبكم قال ليهو : ماشي مومباي.
* السواق استهجن الاجابة دي ...وهو حسب منطق السماسرة الهنود كان عاوز يدخل معاه في جدل ويقول ليهو العالم اصبح قرية..لكن السواق ما اشتغل بيهو ..دور عربيتو وقام.
* نعود الي الهنود ونفصل بعض ما فيهم.
* الهنود شعب مولع بالتوابل والبهارات ... وهو شعب مغرم بالشطة والفلفل .. وهذا وضع يؤكد تحركهم.
* لا يمكن ان نتجاهل عشقهم للمحدقات ..دون ان نربط ذلك بانهم شعب حيوي.. او شعب لاذاع ..او ساخر.
* الشارع الهندي فيه دراما تغني حتي من افلام بوليوود ..لذلك هم لا ترهقهم سينماتهم كثيرا..فهم بطابع الحال دراميون.
* التوابل النافذة في (الحداقة) في كل العالم تحضر من الهند ..بل ان العطور ذات العطر الشايع هي الاخري تأتي من الهند.
* اعتقد ان هذا لا يخرج من طبيعة الهند المناخية ... وانما من طبائع الشعب الهندي الساخنة.
* انيس منصور في كتابه 200يوم حول العالم تحدث عن الشعب الهندي بتشويق يجعل الصورة تنتقل اليك مباشرة من صفحات كتابه.
* كتاب انيس منصور علي ما اعتقد صدر منذ اكثر من اربعين عاما .. وطبع علي ما اعتقد عشرين طبعة وفاز بجوائز عدة وتصدر مباعات الكتب في سنوات مضت.
* اذكر ان انيس منصور توقف عند زحام الهنديين وعن مواصلاتهم التي يعانوا فيها كثيرا.
* الركشة اختراع هندي يوضح بجلاء معاناة الناس في الهند.
* وتوقف انيس منصور عن تقاليدهم وعن احترامهم لتلك التقاليد وايمانهم بها.
* المعروف ان مومباي فيها قرابة العشرين مليون نسمة ... اي ان سكان مومباي لوحدها اكثر من نصف سكان السودان.
* تتميز مومباي ايضا بانها تجمع بين طوائف وسحنات مختلفة .. ويبلغ عدد المسلمين في المدينة نحو 15***1642; من سكان المدينة.
* ملحوظة: مومباي مين يا عم؟.
هوامش
* كرت سادومبا وصل ..ما وصل ..وصل ..ما وصل.
* يا صلاح ادريس الكرت دا لو كان اتحرك من جنوب افريقيا بي ركشة ...كان هسع يكون مكوع في شارع البلدية.
* الكرت يتزحزح متل كرت القبول.
* اكرم ظهر امس في تشكيلة المريخ التي لعب بها امام ماثاري الكيني.
* عودة حميدة للسبعة.
* اكرم شكلو بقي سبعة ..سبعة.
* اكرم سبعة ..عاوزنو يوم 18 يوليو.
* ممكن نعمل ليكم تخفيضات .. وننزل معاكم للاربعة.
* غير كدا ما بنجاملكم.
* عاملين سيكافاتكم الكلها ستات دي.
* الهلال يتمرن صباح ومساء ..والمريخ هنا بيلعب يوم بعد يوم ...يعني بيلعب مباريات دون ان يجري المريخ تمارين.
* جمهور سيكافا ...المرة دي اختفي.
* خبر عاجل:النجيلة شلخوها.

m.sobhi
07-07-2009, 09:08 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg

سيكافا..النسخة المصرية


* ناس الهلال ديل ببالغوا عديل كدا.
* هم ما عارفين الدنيا اخر شهر..واكرم رجع يحرس مرمي المريخ.
* الغريبة ما في مطر.
* اخر شهر وين؟ يا ود الناس ... اول مرة اشوف لي اخر شهر في نص الشهر.
* ناس الهلال ديل هم ما عارفننا ..نحن هنا قلنا سيكافا دي بطولة ضعيفة عشان الاندية فيها بتفوز بالثمانية والستة.
* في داعي يعني يحرجونا كدا ... ويمشوا في مصر يغلبوا الشرطة 5/1.
* هسع نحن نقول لي ناس الوصيف...نمشي وين نحن؟.
* نبررها كيف؟...نحن ...دخلتونا في ضفورنا.
* نحن يا هيثم مصطفي كنا عاوزنكم (تلبدوا).
* تتغلبوا ... تتعادلوا ..بالكتير كدا تغلبوا واحد.
* لكن انتوا طبعكم كعب ...في مصر غلبتو خمسة.
* الناس ديل بي طريقتكم دي ما بستنوكم يوم 18.
* واحتمال كدا يفضوا سيكافا .. ويجوا يعسكروا معاكم في مصر.
* قالوا ليك امير دامر وقت عرف امبيلي جاب ليهو قون في الشرطة ..اليوم كلو بقي (سارح).
* طبيب المريخ قال ليهو في شنو يا امير دامر؟.
* امير دامر قال ليهو (الركبة).
* الظاهر كدا.... امير دامر انتقلت ليهو الاصابة من زميلو سفاري.
* غايتو يا سفاري راجيك جنس جري.
* نحن عارفنك الايامات دي نوم ما بتنوم ...طبعا سفاري عامل فيها عندو (ضرس) عشان يلقي ليهو مبرر كافي للسهر.
* مع سادومبا وامبيلي ... دفاع المريخ دا إلا يشوف ليهو (سماعات).
* سماعات يعمل بيها شنو؟.
* يعمل بيها اي حاجة ...بس ما يقعدوا لينا كدا.
* ان شاء الله يعملوا بالسماعات ...منتدي ... ان شاء زالله يعملوا حملة تطعيم ...نحن مالنا.
* دي حاجة ما بتخصنا...ولا بنجامل فيها.
* خلاص يا الهلالاب عاوزين تخلوا سيكافا وتقبلوا علي (السماعات).
* سماعات مين يا عم؟.
* طبعا بلة جابر وقت عرف الهلال غلب فريق (الشرطة) المصري خمسة، بقي يضحك متل الحوش الما فيه باب.
* متل الباب الما فيه سقاطة.
* بضحك طبعا عشان ما ح يشارك في مباراة القمة.
* فرحان ...مرق من (السدمبة).
* الشغيل قالوا قعد مع رادان وقال ليهو : انا خلوا لي (دي سوزا) براقبوا ليكم زي الما حصل حاجة ...كورة ما بخليهو يلمسها.
* صاحبكم ما عارف انو دي سوزا هسع بيلعب في نيجيريا.
* انت يا الشغيل ما عارف ناس الهلال بعملوها.
* ناس الهلال ديل ..اعادوا مباراة النيل ...غالبهم يعني يلعبوا دي سوزا في نيجيريا.
* انتوا عارفين لو وارغو بيلعب في الهلال ...كان هسع لو قريب بكون وين؟.
* كان علي افضل تقدير كدا ...لو جاملوه ناس الهلال كان سوف يلعبوه في جزر القمر.
* لكن وارغو عرفها والله مرقو ...لقي ناس المريخ ديل الي الان بحتفلوا بيهو عشان سجل هدف في الاتحاد.
* هسع دي عاوزة ليها قلع فانلة يا وارغو.
* لكن برضو ناس الهلال ديل بتوع ارهاب ... وبتوع جرجرة وكلام كتير.
* مباراة القمة باقي ليها 11 يوم في داعي يعني في التوقيت البائخ دا ..يغلبوا فريق مصري وفي الدرجة الممتازة خمسة.
* ناس امير دامر وموسي الزومة ديل ثبتوهم بي (سيكافا) ..جابوا ليهم (حمام) لا بنش لا بخربش ..عشان يثبتوا ...تقوموا انتوا يا ناس الهلال تخربوا اي شيء وتغلبوا خمسة.
* هسع الخمسة فرقها شنو من السبعة.
* قول ستة ونص ...برضو بتحرجوا اكرم سبعة.
* انتوا بتحبوا المشاكل ...رادان دا عاوز ليهو سبب.
* الزول دا بكرة او بعد بكرة ..او بعد خمسة ايام بالكتير ح يقولوا عندي ملاريا.
* يقوم يعمل شنو؟.
* يقوم يسافر المانيا ...تقول حبوب ملاريا هنا ما في.
* يقوم شنو تاني ...ذكروني.
* يقوم صلاح مشكلة يستلم الفريق.
* نحن السيناريوهات دي حافظنها حفظ.
* من زمن كروجر ...نحن بنشوف فيها.
* قالوا ليك رادان بعد ان عرف هيثم مصطفي سجل هدفين ..اتصل بي السفارة الالمانية.
* طبعا انتوا عاوزين تعرفوا اتصل بالسفارة ليه؟.
* ما واضحة دي ...ما عاوزة ليها درس عصر.
* اتصل بالسفارة الالمانية ...عشان يشوفوا ليهو حجز سري ... قال لو ما مرقتو الملاريا قبل المباراة ... ح يسافر بعد المباراة مباشرة ...بأول طيارة ماشية علي المانيا.
* قال لي ناس السفارة ...ان شاء الله تشوفوا لي قطر.
* المسكين ...بقي يعاني من حاجة اسمها (الجلجنة).
* الجلجنة دي مرض بتسببه نجيلة الهلال لخصوم الازرق.
* الجلجنة دي حاجة خطيرة شديد ... اكعب من الملاريا.
* طيب اقول ليكم حاجة ..بتعرفوا (السيجنة).
* السيجنة دي حمي بسببها السور...حمي الوادي البلجيكي.
* غايتو ناس الهلال ديل عندهم جنس حاجات.
* قالوا جابوا ليهم (سياج) من بلجيكا ..يضحك براه زي نار القصب.
* وقالوا كمان عندهم نجيلة ..وقت مهند الطاهر يقلب الهوبة بتعمل فرز الوان ...يعني ببقي فيها خمسة الوان.
* انت كمان ما تبالغ.
* نجيلة هي وإلا (الصرفة الاولي).
* خلاص يا الهلالاب ...عاوزين تخلوا اي حاجة وتقبلوا علي (الصرفة الاولي).
* صرفة اولي في البرد دا.
* في واحد قال وقت شاف اكرم الهادي سليم في مباراة المريخ الاخيرة اتذكر (البرد).
* يا اكرم لو ح تحرس شباك المريخ في مباراة القمة القادمة ..نوعدك ندخل المباراة لابسين فنايل السقط ...نعودك ندخل بي البطانيات.
* الظروف ما معروفة ...يمكن تجيب ليها مطرة.
* مطر في عينك.
* الموضوع دا عاوز ليهو صفحة.
* ننتظر كرت سادومبا يصل ونعمل (من الغلاف للغلاف).
* انتوا يا صلاح ادريس كرت سادومبا دي ح يجيكم بي (نجيلتو).
* النجيلة بقت (شجر) عديل كدا ... والكرت ما وصل.
* ملحوظة: انتظروا الحلو ..اقصد انتظروا الكرت.
هوامش
* هيثم مصطفي قالوا بقي كورة يصنع منها هدف ...وكورة يسجل بيها براه هدف.
* الطريقة دي بتعمل حول في (الركبة).
* اي حاجة نحن عندنا بي نظام.
* اها ياسفاري في مباراة القمة بترقبوا ..منو وإلا منو وإلا منو ..وإلا منو؟.
* سيدا وإلا مهند وإلا ايفوسا وإلا امبيلي وإلا كاريكا وإلا سادومبا.
* عاوزين ليكم لجنة مراقبة عديل.
* الموضوع دا صعب علي ناس امير دامر.
* وبيني وبينكم والكلام دا ما يطلع من العمود دا ...امير دامر بفك المراقبة.
* سفاري بنوم عديل كدا.
* بختكم يا ناس سا سا سا سادومبا.
* كابوندي خلي ليك الطرف الشمال في الهلال متل الفيلم الهندي.
* الباك قالوا يبلع في ريقو متل الزول العربيتو معطلة في نص الكوبري والعربات وراه تضرب في البوري.
* بوري وين في البرد دا.
* خلاص يا الهلالاب عاوزين تخلوا اي حاجة وتقبلوا علي (البوري).
* البوري مالو ..عيبوا لي بس.
* بصمة كامبوس ظهرت.
* بصم ما بصم... بصم ما بصم...بصم ما بصم.
* طبعا ناس المريخ الليلة ح يغالطوكم في بصمة كامبوس.
* بصمة كامبوس انتوا بتعرفوا ليها شنو؟.
* شوفوا كراسيكم كم؟.
* روني وكاريكا ...شافوا امبيلي وسادومبا دوروا زي الترتيب.
* ترتيب شنو كمان.
* المحيرني خليفة..قالوا شغال شغل صاح في الطرف اليمين.
* تلقوا موسي الزومة هسع شايل همّ من خليفة.
* قالوا ناس المريخ قرروا يراقبوا خليفة بي اربعة لاعبين.
* انتوا لو عملتوا كدا مع خليفة مع سادومبا تعملوا شنو؟.
* الامبلة كيف؟.
* سادومبا قالوا ما براقبوه ...عشان النتيجة في الحالتين واحدة ...اخير يراقبوا الزول الممكن يتقفل ليهم.
* بعدين دا منو دا القنعان من روحو دي.
* قلت ليكم سادومبا دا في الكور العالية بنطوا معاه سبعة بنزلوا اربعة.
* نفسي اعرف الثلاثة ديل بروحوا وين؟
* لو في حكم مفتح ..بيلغي المباراة.
* مباراة مين يا عم؟.
* الاخ الاستاذ عبداللطيف ضفاري (فليط) ...السلامة والعافية لوالدته التي نتمنى لها دوام الصحة.ونخصها بالذكر لأنها والدة لنا جميعا.
* ريتشارد الله يصبرو ساكت.
* انتظر ديسمبر.
* خبر عاجل: ديسمبر دا وقت يجي ..يمكن نجيلتنا تشيل (مانقه).

m.sobhi
07-11-2009, 11:13 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg

هلال..إحنا نحبكووو


* عندما جاء كامبوس لتدريب الهلال ..كان جمهور الهلال يستقبله بشيء من (الترقب) الذي يصل لحد اللهفة (لو وشوش صوت الريح في الباب يسبقنا الشوق قبل العينين).
* قعدنا نتسابق زي كاكي.
* كان المدرب البرزيلي الذي درب في الكويت والسعودية والامارات والبرازيل واسبانيا ..يمتع نفسه بالدهشة علي طريقة عمر الطيب الدوش .. وجماهير الهلال يستقبلونه في (دبي).
* المدرب ادهشه ذلك ..ان يصل الحب حد مطار دبي ليستقبله شباب الهلال في الامارات.
* في الوقت نفسه كانت صحافة الهلال تراقب تحركات كامبوس ...منذ ان كان في البرازيل (صبيا).
* وشباب منتديات الهلال عبر خدمة الانترنت ينقلون اخبار المدرب العالمي ..يوم ان تحرك من البرازيل ..وساعة ان وصل دبي ..ولحظة ان ستحل طائرته الامارتية لتبلغه الخرطوم.
* وجمهور الهلال يراقب تحركات المدرب مراقبة (المشوق المستهام).
* حتي حل بين ظهرانينا المدرب العالمي ليجد الخرطوم كلها في استقباله بمطار الخرطوم.
* ناس واقفة في الباب ..زي قبالة العيد.
* ولا عجب في ذلك فقد احبت جماهير الهلال المدرب حتي قبل ان تراه عملا باستثناء بشار بن برد (والاذن تعشق قبل العين احيانا).
* كامبوس في البدء ظن ان ذلك التدفق الجماهيري في استقباله ..عمل مدبر ..وهو عند السودانيين من ادب الضيافة.
* لكن مدرب الهلال جاء ليدهش مرة اخري وجماهير الهلال تزحف بقوة نحو تمارين الهلال.
* كان كامبوس اول مدرب يزاحم اللاعبين في نجوميتهم ..حيث اصبحت جماهير الهلال تشاهد تمارين الفريق من اجل ان تتابع تمارين كامبوس ..وحتي تشاهد تدريباته وتهتف باسمه.
* لذا كان من الطبيعي ان يندهش هذا المدرب من هذه الجماهير ..التي تعشق فريقها بصورة ساحرة.
* تلك الجماهير التي عزها الهلال بعدم الخسارة امامها 117مباراة ...لابد انها جماهير غير اعتيادية.
* جماهير فيها سحر ...وفيها ابداع ...لأن التمريرة الجيدة ...قبل ان تخرج من (سيدا) حفظه الله ورعاه ...بتخرج من مدرجات الهلال.
* وقبل ان يسجل امبيلي الهدف ...بتسجل مدرجات الهلال.
* قوة الهلال في جماهيره ...وقوة جماهير الهلال في عشقها للهلال.
* هذا الحب لا يخرج غير الانتصارات ولا يولد غير البطولات ..والسلاح الذي يقاتل به الهلال ويلعب ..هو حب الجماهير له.
* والبتغلب بيهو ..العب بيهو.
* جميل ان الهلال فيه انتماء غالب للوطن ... يبدو ان وطنية الهلال وعظمة سيرة تأسيسه كان لها ذلك الفضل في ان تكون انت وطني بطبيعة الحال ..اذا كنت هلالابي.
* اكثر ما يسعدني في الهلال انه جعل شعاره (الله ..... الوطن ....الهلال).
* ويسعدني ان لاعبي الهلال يضعون علي صدورهم حذية القلب ...خريطة السودان.
* هذا الذي ابتكر ذلك الشعار لا بد من انه بلغ العبقرية بفضل وطنيته.
* جميل ان تري خريطة السودان يحتضنها الهلال ...وكل هذه الاشياء تحتضنها القلوب.
* نتمني ان يلتزم الهلال في كل شعاراته وقمصانه التي يلعب بها بوضعية خريطة السودان المتميزة والهلال الشعار يحيط بالخريطة من كل جانب.
* الطريف في الامر ان المريخ حاول ان يقلد الهلال في ذلك الانتماء الوطني فحرج من ان يضع علي قمصان المريخ خريطة السودان فوضع بدلا منها علم السودان..هذا عمل جميل لا بأس به ...لكن ان تضع خريطة السودان علي صدور لاعبي الهلال فان ذلك يبقي الامر الاجمل.
* لذا فان ارتباط جماهير الهلال بالوطن ...ارتباط يدعو له الهلال وهو امر من المقدمات في الهلال.
* اعود الي جماهير الهلال التي عادت فادهشت لاعب الهلال الجديد (سادومبا) الذي وجد جماهيرا لا تحمل للهلال غير (العشق) وهي تمتلئ به فتملأ الطرقات.
* سادومبا علي طريقة الشاعر الراحل مجدي النور فاجأه النهار:
فاجأنى النهار .. وأنا ماشى بيناتا
أتساقط باقي حنين .. لسه عيونك ياها عيونك
تكسر باب الدم السرى .. وتجرى تنعس عشب القلب
* هذا الذي وجده سادومبا من جماهير الهلال ادهشه ..فقد قال انه احس بعظمة الهلال وهو في المطار ..واحس بتلك الجماهير وهو في الشارع العام ..واحس بها وهو في الفندق الذي ينزل فيه..رغم انه لم يكمل 48 ساعة في السودان.
* جمهور الهلال يشعرك بوجوده ..تحس بتلك الجماهير في الشمس الحارة ..في (عرق الجباه) ...في النيل ..والكوبري ..وشارع بيتنا.
* في الناس الهناك ...الشالتهم الغربة ...وبقوا معانا رغم المسافات ..رغم الزمن ...شاركونا في (الالفة والشوفة) وشاركناهم في (الشوق والحنين).
* وبقي بيناتنا الهلال ..في كلامنا ..وفي سلامنا وفي عيونا وفي قلوبنا.
* نتونس بيك الليلة ...امبيلي عمل (فلترة) للباك ..وهيثم مصطفي بقي يمرر ويسجل ...متل القهوة البجيبوا ليك سكرها برة.
* يا سادومبا تعرف نحن مدينا بيك (الضل) وقعدنا نقرأ في الجرايد.
* ناس الهلال كلمتهم طالعة في اي حتة ...وايدهم واصلة ..ونيتهم بيضا.
* المدهش ان سادومبا قال في حواره لصحيفة (صنداي ميل) الزيمبابويه انه وجد اهتماما كبيرا من الاعلام السوداني وقال أن الصور التي التقطت له خلال اسبوع أكثر من الصور الموجوده له في أرشيف الصحف الزيمبابويه.، شفتوا الفرق.
* وارغو قال ما قادر يتأقلم علي السودان.
* خلاص يا وارغو باشا.
* خرج يوسف محمد من الهلال للمنتخب النيجيري وانتقل من الهلال للعب في احدي الدوريات الاوروبية.
* ريكاردو الذي درب الهلال وجاء اليه مدرب تنقصه النجاحات بعد ان اكمل فترته في الهلال اصبح مطلوبا من كل الاندية العربية..ومازال حتي وقت قريب يسعي للتعاقد معه الاهلي المصري.
* بل ان الهلال صنع من داريوكان مدافعا ..تتمناه كل الاندية.
* وقودوين مثال اخر لحسن صناعة الهلال.
* انه الهلال ..الذي يحتفظ بسره عند جماهيره.
* ويبقي الحب.
* ملحوظة: حب مين يا عم؟.
هوامش
* قلنا ان الاصابات في سيكافا سوف تشكل حرجا كبيرا علي المريخ وسوف يفقد المريخ الكثير من لاعبيه بسبب الاصابات.
* في مباراة الامس فقد المريخ بعامل الاصابة قلق والعجب.
* قبل ذلك كان المريخ قد فقد بسبب سيكافا طمبل.
* لو استمر المريخ بهذا المعدل في الاصابات فان المريخ سوف يلعب مباراة القمة بتشكيلة تتكون من خميس مارتن ودقاشية وحارس الكاملين.
* المريخ لو فقد وارغو بعامل الاصابة فهو مكسب له.
* يا ناس سيكافا ...وارغو دا اوعكم تصيبوه لينا.
* نحن عاوزنوا يكون اضافة للهلال في مباراة 18 يوليو.
* كلتشي انتهي ...بقي يفرح عشان سجل في فريق (سيكافاوي).
* حتي في سيكافا ...المريخ طردوا ليهو لاعب من الفريق الخصم.
* انتوا عادتكم دي اصلوا ما بتخلوها.، طبعكم كعب.
* ريتشارد اوراقو حولوها لمجلس الادارة.
* انتوا ريتشارد دا عمل شنو عشان يحولوا اوراقو!!.
* الاستاذ رمضان احمد السيد منذ زمن كان يروج للقاء المريخ ومازمبي ..وها هي حسابات رمضان تصدق.
* ناس المريخ لانهم رعوا البطولة يمكن يغيروا مازمبي ..ويشوفوا ليهم حمام مستوي.
* الجماعة ديل الحمام العندو ريش ما بقدروا عليه.
* الحمام لو ما كان (مشوي) ما بضربوه.
* زمان كان في قفص حمام في (كديسة) كل يوم بتتهجم عليه تشيل ليها جوز حمام وتتخارج.
* تتصوروا في انتشار مرض انفلونزا الطيور (الكديسة) بقي لو ما شالت الكرت الصحي من جوز الحمام ما بتلتهم ليك الحمام.
* كديسة (متعولمة).
متعولمة في عينك.
* سادومبا في مصر قالوا قعد يستمتع بالفرجة في لاعبي الهلال.
* زول قاعد في الكنبة وفرحان.
* يعني ما زي ناس كلتشي وطمبل والعجب ديل ..الواحد فيهم وقت يقعد في الكنبة ...تقول عاوزين يفحصوا ليهو.
* علي ناس الهلال ان يبلغوا سادومبا وامبيلي ..قولوا ليهم سعيد السعودي برجف في مباريات القمة.
* عندكم ضربة جزاء جاهزة يا ناس الهلال.
* سعيد السعودي دا عندنا بشكل خطورة علي المريخ زي كاريكا.
* مستوي المريخ الحالي لا يأهله حتي للصعود لمباراة النهائي في البطولة المنسية.
* وارغو دا عاوز يسجل متين؟.
* بقينا (نتحورج) ليك يا ود الناس.
* انت قايل القون في التعاون والشجرة بحلل ليك الـ 5مليون دولار.
* بختك يا وارغو جابوا ليك لاعب اسمو (الدافي) اكرم الهادي سليم كل ما يشوفوا يتذكر حاجة.
* هسع انا جبت سيرة البرد.
* في زول هنا من الشباب ديل ...جاب سيرة المطر.
* ولا حتي لمحنا ليها. إحنا مالنا.
* كان بس مافي داعي تجيبوا ليكم لاعب من المغرب (اكرم) من اكرم ...واسمو (الدافي) كمان.
* يا ما انت (كريم).
* كريم مين يا عم؟.
* كريم الدافي؟.
* الدافي مين؟.، الدافي كريم.
* دافي في البرد دا.
* كريم في الزمن دا.
* لكن ناس المريخ ديل مفتحين ..عرفوا ليك حكم مباراة القمة من المغرب ...طوالي مشوا جابوا ليهم لاعب من المغرب.
* عالم مفتحة.
* اسامة جويلي ..قال العجب واحد اتكلم معاه ساكت اتعوق.
* خلاص يا ناس زامبي اتكلموا لينا مع (ايداهور).
* خبر عاجل: لو عاوز تهجم ليك مريخابي قول ليهو يوم 18 باقي ليهو 4 أيام.

m.sobhi
07-11-2009, 11:15 AM
http://up3.m5zn.com/9bjndthcm6y53q1w0kvpz47xgs82rf/2009/6/29/09/x2b6ycpiy.jpg


ما ذنبي!!


* ناس المريخ شافوا (كامبوس) بتابع بالفيديو وبسجل وبدون في مباريات المريخ ..قالوا :نحن ليه نعمل كدا ...ليه نقدم المريخ في طبق من فضة لكامبوس.
* الكمبسة يعجبك ..زول ما بقصر.
* كامبوس (شفت) ...الفريق البشوفو ...بشربو شراب ...بحفظوا حفظ ..بعرف ليك مفاتح اللعب ..ونقاط ضعف الفريق.
* الزول دا عارف اي حاجة.
* قال المريخ دا مالو كلو باكات.
* باكات وتامين لعبهم كمان بالحكم.
* الجماعة ديل (ناس الوصيف)... تصدقوا بعد ما وصلوا نصف النهائي قالوا نقلب بطولة سيكافا ...بطولة سرية.
* قاموا عملوا شنو؟.
* قالوا ما عاوزين التلفزيون ينقل المباراة ...عشان شنو؟.
* عشان كامبوس قلنا ليك؟.
* كامبوس دخلو شنو بي مباراة مقامة في سيكافا بين المريخ ومازمبي.
* الزول دا خلاص ..عرف اي حاجة... حاجاتكم دي كان تعملوها زمان.
* قالوا ليك كامبوس قال : ح يبني استراتيجيته علي سعيد السعودي.
* براه عرف ان سعيد السعودي برجف.
* وعرف كمان ...ان سفاري عندو مشاكل في الركب.
* وعرف ان امير دامر قاعد ساي ممكن يطلع من جو المباراة في اي لحظة ..لو امبيلي قام بيهو في مشوار.
* قالوا امبيلي يوم 18 ح يحضر ليه دبلوم عالي في (زعزعة) الركب... وقالوا كابوندي ح يحضر رسالة الماجستير في (زغزغة) العيون.
* غايتو يا (الباشا) اليوم داك بتبقي (شيخ غفر).
* طبعا العجب عرف الموضوع ما نافع ....قال احسن يدخل كراعو في الجبص.
* عرفتها يا العجب.
* انا خائف (سفاري) تعجبوا الفكرة ..يقوم يدخل كرعينو الاتنين في الجبص.
* سفاري شفقان ..ما بكتفي بي واحدة.
* سفاري عارف لو دخل كراع واحد في الجبص ...ناس ابوجريشة ديل بلعبوه بي جبصو.
* غايتو سيكافا دي قدمت خدمة جليلة للهلال.
* الهلال كان محتاج شنو ؟..غير انو كامبوس يعرف طريقة لعب المريخ المعتمدة علي الارسال الطويل.
* كامبوس ناس الهلال معاه في معسكر في القاهرة ..بمرن فيهم صباح ومساء ..عرف اي حاجة في الهلال ..كان محتاج فقط يعرف المريخ باعتباره (ند) للهلال.
* مهما يحصل ...المريخ برضو (ند) للهلال.
* ناس الهلال قالوا نعمل شنو عشان كامبوس يشوف المريخ ...ويعرف اي حاجة.
* فكروا كدا ...قالوا احسن حاجة ..المريخ ينظم بطولة سيكافا.
* لكن ناس الهلال يقنعوا ليك ناس المريخ كيف بتنظيم البطولة؟.
* اول حاجة ناس الهلال اشاعوا ان المشاركة في بطولة سيكافا فرصة كويسة وجيدة للاعداد للبطولة الافريقية.
* قام شنو؟.
* قام ناس المريخ صدقوا الكلام دا .. واعتبروا الهلال تلقائيا ح يشارك في البطولة.
* قالوا وقت الهلال ح يشارك يبقي مافي مشكلة ... تبقي لينا فرصة نشوف الهلال بعد تسجيلاته الاخيرة ... ومدربه الجديد.
* ناس الهلال عشموا ليك المريخ بالمشاركة ..قالوا دي فرصة ننظم البطولة ...بطولة يشارك فيها الهلال بتبقي بطولة مضمونة النجاح فنيا وماديا.
* عشان كدا نظموا البطولة بي عين قوية.
* مع هذا اعتبروا الهلال (سيد البلد) زيو وزي اي فريق ... يشارك بدون اي تميز.
* ناس الهلال قالوا كدا ...كويس يا ناس الوصيف.
* صلاح ادريس ... رفض يعطي ليك ناس المريخ رد قاطع.
* ناس المريخ لا عرفوا الهلال ح يشارك في البطولة لا عرفوه ما ح يشارك.
* بقوا يمشوا ويجوا ... والهلال لم يعطهم جواب نهائي.
* اعلنوا عن قيام القرعة ... الهلال لم يحدد موقفو.
* عملوا القرعة. الهلال ...لم يحدد موقفو.
* عشان كدا قالوا احسن نخلي حتة الهلال فاضية.
* ناس الهلال قالوا ليهم تخلوا ...الحتة فاضية ما تخلوها ..دي ما قضيتنا.
* المريخاب ديل انتظروا ليك الهلال الي اخر لحظة ... اخر حاجة كدا ناس الهلال قالوا ليهم سيكافا شنو البنشارك فيها.
* الهلال قال كدا بعد الاندية ما وصلت السودان .. ولم يكن امام المريخ خيار غير المشاركة.
* الجماعة شاركوا.
* كامبوس موصنوا ..شال ورقتو وقلموا وبقي يتابع في مباريات المريخ.
* قالوا ليك وقت المريخ دا يلعب مباراة في سيكافا ...كامبوس دا في القاهرة بشيل ورقو وقلموا وبقفل عليه الغرفة.
* نحن الهلالاب اتحيرنا من الحركة دي ..ناس المريخ كيف؟.
* الموضوع دا طبعا جهجه المريخاب شديد وازمهم ازمة قوية.
* قالوا نحن نعمل شنو في البرد دا.
* في واحد منهم قال ليهم احسن حاجة ننسحب من البطولة دي .. ونرتاح من تدوين ملاحظات كامبوس دا.
* واحد تاني قال ما معقول نعمل كدا ...نحن منظمين البطولة كيف ننسحب منها.
* نودي وشينا وين من الهلالاب؟.
* قلت ليكم ناس الهلال ورطوهم ...قعدتوا تغالطوا.
* السنة كلها تغالطوا.
* اخر حاجة ...في واحد مفتح منهم ..قال ليهم احسن حاجة ما نتلفز المباراة ...البرازيلي بتاع الهلال دا عرف اي حاجة.
* قالوا خلاص ...ما ح نتلفز مباراة المريخ ومازمبي... نشوف كامبوس دا بعمل شنو؟.
* كامبوس طبعا صعب .. وناس المريخ اعلنوا عدم التلفزة دي من بدري.
* في ناس قالوا كامبوس تابع المباراة في الراديو.
* وفي ناس قالوا كامبوس في الراديو ح يفهم شنو يعني ...عشان كدا الجماعة ديل قالوا كامبوس جاء حضر المباراة متخفيا في استاد المريخ ورجع.
* انتوا قايلين صلاح ادريس ما بعمل الحكاية دي.
* ناس الهلال ديل ما في حاجة بعيدة عليهم.
* السنة الماضية ناس الهلال جابو دي سوزا من بوليفيا.
* السنة دي عارفين ناس الهلال عملوا شنو؟.
* ناس الهلال حولوا دي سوزا عشان يلعب في نيجيريا.
* نيجيريا دي اهلها طلعوا يلعبوا برة منها.
* في داعي انتوا يا ناس الهلال تودوا ليها لاعب برازيلي.
* نحن بعد سمعنا المباراة عرفنا ليه المريخ رفض تلفزة المباراة.
* ليكم حق تعملوا كدا (الشينة منكورة) ...الشينة ما بتلفزوها.
* دا شنو البتعملوا فيه دا يا ناس المريخ.
* انتوا كلو ما تشتهوا ليكم (فضائح) ...تنظموا بطولة سيكافا.
* بطولة تكتلوا فيها (صحفي) ..وبطولة تضربوا فيها رجل الراية .. وتصيبوه.
* حالتكم دي منظمين المباراة.
* انا يا دوب عرفت ليه؟...المباراة اتلعبت في (السر).
* دي مباراة فضيحة عديل.
* الحكم كالمعتاد شافكم مغلوبين .. وبين الشوطين .. وعلي رأي الاخ الاستاذ خلف الله ابو منذر ..غرفة اللاعبين في استاد المريخ فيها باب خلفي فاتح في غرفة الحكام.
* الحكم دخل الغرفة دي بين الشوطين ... اول من طلع منها ...زولكم ما كذب طرد ليكم لاعب من مازمبي.
* جنس فضائح.
* الفضيحة الكبري ليست في الطردة ... وانما الفضيحة الكبيرة في انو بين الشوطين غيرتو لائحة البطولة.
* نظام سيكافا ... المباريات التي تنتهي في الزمن الرسمي بالتعادل فان المباراة تحسم بالضربات الترجيحية.
* هذا النظام هو الذي حسمت به مباراة سابقة في البطولة نفسها.
* لكن عشان سيكافا بطولة لا لائحة لها ولا قانون وهي عبارة عن فوضي فان المريج اختار الزمن الاضافي بعد ما شافوا مازمبي لاعب ناقص.
* قالوا دي فرصة نغلب فيها ..الفريق ناقص .. والضربات الترجيحية ما مضمونة.واكرم ما مضمون.
* اكرم مين يا عم؟.
* عشان كدا.
* عشان كدا شنو؟.
* عشان كدا .. المباراة اقيمت في (السر) .. ولم تتلفز.
* مباراة زي مباراتكم دي .. اذاعة ساكت ما مفروض تذيعوها.
* مباراتكم دي مفروض كان يمنع فيها اصطحاب الاطفال .. دي مباراة رعب.. مباراة فضيحة عديل ... ولا تقل بأي حال عن مباراة سيمبا.
* الحمدلله كامبوس ما شاف المباراة ... لو شاهدها كان اخذ فكرة سيئة عن السودان.
* لكن كامبوس ان شاءالله سوف يشاهد نهائي سيكافا (الفضيحة) من داخل الاستاد.
* اها بتقدروا تمنعوه من دخول المباراة.
* مفروض من هسع ناس الهلال يرتبوا لي كامبوس لمشاهدة المريخ علي الطبيعة ..ولمشاهدة الملعب الذي سوف يلعب فيه يوم 18 يوليو.
* عشان يرسم الخطة بمشاهدة (العين في العين) .. خلاص مرحلة المتابعة بالفيديو انتهت.
* يمكن ناس المريخ يسمعوا الكلام دا .. يقوموا يحولوا المباراة لتلعب في جزيرة سيشل.
* ملحوظة: سيشل في عينك.
هوامش
* مازمبي .. ذنبي ماذنبي ..ذنبي ..ما ذنبي..ذنبي ما ذنبي.
* فريق (ضيف) تعلموا فيه كدا.
* مازمبي يستاهل ..عشان تاني يشارك ليه في بطولة (جاهلية).
* بطولة لائحتها توضع بعد المباراة وحسب مصلحة الفريق المنظم.
* بسبب الباب الخلفي الموجود في غرفة اللاعبين والفاتح علي غرفة التحكيم ..عرفنا لماذا يتم طرد لاعب من الفريق الذي يلاعب المريخ في كل المباريات التي تقام في استاده.
* يوم 18 يوليو ..لو الحكم طرد من الهلال ثلاثة لاعبين ...الهلال ح يغلب.
* شوفوا ليكم طريقة غير الطريقة دي.
* اذا نظم المريخ بطولة كاس العالم (للمنتخبات) بهذه الطريقة التي نظم بها سيكافا .. ح يشيل كاس البطولات.
* بطولة سيكافا الحالية ذكري جيدة للناس ..لتثبت كيف يفوز المريخ بالكاسات المزعومة (جويا).
* انها الكاسات المحمولة (كاشا).
* الاخ اسامة جويلي ... اول امس كان في حالة غضب عارمة .. قال جمهور مازمبي ضرب حكم الراية .. ورمي الملعب بالحجارة.
* طبعا الصفوة ما بعملوا كدا.
* صفوة مين يا عم؟.
* انا اول مرة اشوف لي صفوة ..برموا الضيوف بالحجارة.
* انس المدني قال سيكافا دي بطولة زي (الحربوية) كل مرة بي قانون جديد.
* جنس لوائح.
* انتوا الحاجات دي بتجيبوها من وين؟.
* لائحتكم دي في (جر الحبل) ما سمعنا بيها.
* لو الهلال كان مشارك في البطولة دي لا قدر الله ..كان الهلال انسحب من البطولة بعد مباراة اول امس.
* الشوط الرابع الاضافي بين المريخ ومازمبي لو انتهي بالتعادل ايضا ..كان جهابذة المريخ طلعوا ليهم قانون جديد .. وعملوا ليهم شوط خامس.
* بتوع البصمة ديل ...عملوا ليهم (بصمة) ..غالبهم يعملوا (لائحة).
* ولو الشوط الخامس انتهي بالتعادل ..كان عملوا ليهم شوط سادس.
* الاشواط دي كان الي الان بتكون مستمرة ..لو انتهت كل الاشواط بالتعادل.
* ضربات ترجيحية ..نهي ..نهي ..نهي.
* بطولة سيكافا ذكرتنا مباراة درع الانقاذ عندما اشرك الهلال لاعبه عاكف عطا ..فحسمت شكوي المريخ في المقصورة قبلها ..ليمنح المريخ الدرع ..في اسرع شكوي تحسم في الدنيا.
* شكوي حسموها قبل ما يقدموها.
* هسع ناس المريخ ديل عملوا ليهم (لائحة) جديدة في الزمن البدل الضائع ...عندما رفع الحكم الزمن الضائع للشوط الثاني ..ناس المريخ عملوا ليهم لائحة جديدة.
* بطولة اي مباراة فيها بي لائحة مختلفة.
* بطولة زي سوق الملجة ..اي حاجة بي لائحة.
* سيكافتونا ساكت.
* جنس سكوفة.
* كاس بطولة سيكافا مفروض يكون (بطيخة).
* وفي البطيخة مفروض تكون (قرعة).
* وفي القرعة ..مفروض تكون (مخوخة).
* خبر عاجل: يوم 18 إلا تشوفوا ليكم 17 حكم ...عشان تمرقوا مننا 4 حكام ما بمرقوكم.